VIDEO: I vodhën 30 vite më parë, hajdutët e “ndershëm” rikthejnë kambanat e kishës

Në 1992, pra përpara 30 vitesh këmbana në kishën e Shën Kollit në Rehovë të Kolonjës do të vidhej për tu mos u gjetur më pas. Këtë javë duket se ata që e kishin marrë, janë penduar.

At Kristaq Tase, kleriku i kishave të kësaj zone beson se pendesa bëri që hajdutët të kthejnë këto këmbana.

“Në kishën ortodokse pendimi është një nga misteret e saj dhe Perëndia vepron në mënyrë të ndryshme. Erdhi dita, ato ishin lënë pranë një kishe, ndoshta nga ata që i kishin marrë pas pendimit të thellë”, u shpreh ai.

Kleriku është kritik me shoqërinë e me median, pasi rastet e vjedhjes së kishave duhet të trumbetohen me tepër, e shoqëria duhet të ndërgjegjësohet.

“Vazhdojnë vjedhjet e grabitjet e kishave. Njerëz dashakeq i dinë bankat dhe sikur kanë të ardhura të mëdha. Kisha ka nevojë për to sepse janë kontribute të besimtarëve. Gjatë këtyre viteve ka pasur shumë fenomene të këqija dhe në televizionet tuaja jepet për kortezi, ndodhi në filan vend filan fshat”, tha më tej Tase.

Për banorët e Rehovës kthimi i kambanës i bën të lumtur, pasi për ta ajo sjell nostalgji të viteve të mëparshme.

“Nostalgji, kjo dëgjohej në gjithë fshatrat përreth, është e ri derdhur, është sjellë nga Mali i Shenjtë me mushke, u ca dhe u riderdh në Leskovik. Ka nostalgji, përdorej kur iknim në punë, në kishë etj”, tha një banor i zonës

Në vitet 1992-1993 u vodhën kishat e Shën Kollit në Rehovë, kisha e Profitit në Prodan, kishat e fshatit Llëngë, Gostivisht dhe Vodicë.