Vuçiç: Serbëve po u bëhet presion që t’i pranojnë targat RKS, Evropa po hesht

Presidenti i Serbisë, Aleksandër Vuçiç, ka reaguar ndaj vendimeve të Qeverisë së Kosovës për targat dhe reciprocitetin për letërnjoftimet.

Vuçiç tha se serbëve “do t’u bëhet presion që të pranojnë targat RKS”.

“Na dhanë afat deri më 31 shtator dhe planifikojnë sulm të përgjithshëm në veri të Kosovës deri më 1 tetor. Qytetarët e Serbisë duhet ta dinë se janë përkrahur nga përfaqësuesit e QUINT-it”, tha Vuçiç gjatë një konference për media, duke shtuar se “mendoj se kjo është konferenca më e mprehtë që kam mbajtur”.

Gjithashtu, ai potencoi se serbët kanë përmbushur gjithçka nga marrëveshja e Brukselit dhe nuk kanë bërë asgjë, ndërsa “Evropa hesht për këtë”.

Tutje, kreu i shtetit serb theksoi se populli serb ka vite që vuan nga gënjeshtrat e përfaqësuesve e vendeve të QUINT-it ashtu edhe nga përfaqësuesit e shqiptarëve të Kosovës, duke shtuar se ata “mendojnë se janë shumë të zgjuar”.

“Ne kemi m10 vjet që përpiqemi të arrijmë një kompromis dhe ata thjesht kërkojnë të na poshtërojnë dhe të dëbojnë njerëzit tanë. Përgjigja jonë do të jetë e matur, por vdekjeprurëse dhe e vërtetë”.

Por, ai ka theksuar se “ne nuk do të ndërmarrim asnjë veprim ushtarak”, por u kërkojmë atyre që të mos përpiqen të kapin pronat dhe të dëbojnë njerëzit tanë. Kanë kohë të mjaftueshme për të menduar deri më 30 shtator”.

Qeveria e Kosovës, në mbledhjen 85-të, të enjten e 29 qershorit ka miratuar vendimin për të mundësuar regjistrimin e automjeteve me targa “RKS” për të gjitha automjetet e pajisura me targat “PR”, “KM”, “PZ”, “GL”, “UR”, “PE”, “DA” apo “ĐA”, si dhe vendimin për kalimin e kufirit shtetëror nga qytetarët me dokumente personale të lëshuara nga autoritetet e Serbisë.

Sipas këtij vendimi regjistrimi do të fillojë në fillim të gushtit dhe do të zgjasë deri më 31 shtator.