Zëvendëskryeministri i Serbisë, Aleksandar Vulin, ndodhet në një vizitë zyrtare në Rusi, ku të hënën, më 12 gusht, mori pjesë në ceremoninë e zbulimit të monumentit të partizanëve jugosllavë në Parkun Patriot pranë Moskës.
Me atë rast, siç ka njoftuar Qeveria e Serbisë, Vulin ka thënë se “serbët dhe rusët e fituan lirinë e tyre në Luftën e Dytë Botërore dhe lirinë u sollën edhe kombeve të tjera”.
“Serbët dhe rusët nuk kanë zgjedhur kurrë anën e gabuar të historisë”.
Qeveria e Serbisë njoftoi se Vulin do të takohet me zyrtarët më të lartë të Rusisë në Moskë, si dhe do të vizitojë ekspozitën e pajisjeve ushtarake në kuadër të Forumit Ushtarak dhe Teknik Ndërkombëtar “Ushtria 2024”.
Kjo është vizita e tij e dytë zyrtare në Rusi që kur u zgjodh në postin e zëvendëskryeministrit të Serbisë më 2 maj.
Më parë, në mesin e qershorit, ai u takua me drejtuesit e shërbimeve ruse të sigurisë.
Ai ka shkuar në Rusi në disa raste që nga fillimi i pushtimit rus të Ukrainës në vitin 2022, shkruan REL
Ajo është nën sanksione nga Shtetet e Bashkuara të Amerikës, ndër të tjera, për shkak të lidhjeve të saj me Rusinë.
Qeveria e Serbisë njoftoi se ministri pa portofol Nenad Popoviq, i cili është edhe kryetar i pjesës serbe të Komitetit Ndërqeveritar Serbo-Rus për Bashkëpunim Tregtar, Ekonomik dhe Shkencor-Teknik, këtë javë do të jetë për vizitë zyrtare në Moskë.
Popoviq të martën, më 13 gusht, do të takohet me Ministrin e Zhvillimit Ekonomik të Rusisë, Maksim Reshetnikov.
“Është një takim koordinues i Komisionit Ndërqeveritar, ku palët do të diskutojnë për përgatitjen e seancës së ardhshme të atij komisioni, si dhe planin e aktiviteteve për periudhën e ardhshme”, njofton Qeveria.
Për shkak të lidhjeve të tij të ngushta me Kremlinin, Popoviç është gjithashtu në listën e sanksioneve amerikane.
Pushtimi rus i Ukrainës ka hyrë në vitin e tretë, kohë gjatë së cilës Serbia nuk ka hequr dorë nga lidhjet e saj me Rusinë.
Zyrtarisht, Beogradi mbështet integritetin territorial të Ukrainës, por refuzon të vendosë sanksione ndaj Moskës, e cila, si një vend kandidat për anëtarësim në Bashkimin Evropian, po kërkohet nga partnerët e saj perëndimorë.
Ai e arsyeton refuzimin e tij me lidhjet miqësore me Rusinë, por edhe me mbështetjen që merr prej saj në nivel ndërkombëtar.
