William Walker: Librin për Reçakun po e shkruaj para se të shkoj në botën tjetër

“Librin për masakrën e Reçakut po e shkruaj dhe po provoj ta përfundoj para se të shkoj në botën tjetër”.

Kështu tha për gazetën Insajderi, ish-Ambasadori i OSBE-së në Kosovë, William Walker, pyetur rreth librit të tij të kujtimeve për Reçaku, për të cilën qeveria kosovare ndau 70 mijë euro për botimin e tij.

“Do të jetë një libër i vetëm, përshkrime të përjetimeve të mia të ngjarjeve në Reçak, të atij krimi. Do të jetë një përmbledhje e asaj”, na tha Walker.

Në lidhje me rëndësinë e botimit të këtij libri, William Walker kujton se Masakra e Reçakut ishte pikëkthesa historike e cila lëvizi tërë Aleancën e Atlantikut të Veriut për të ndërhyrë në Kosovë kundër regjimit gjenocidial të Sllobodan Millosheviçit.

“Rëndësia është se Kosova është një shtet i ri në qendër të Evropës dhe nuk mendoj se do ishte bërë ashtu siç u bë nëse masakra e Reçakut nuk do të kishte ndodhur dhe reagimi ndërkombëtar të mos kishte qenë ai që ishte, aq fuqishëm. Solli luftën e NATO’s, që mendoj që askush atë kohë po e mendonte, e cila erdhi më së shumti si rezultat i reagimit pas masakrës së Reçakut”, tha ai.

“Mendoj se Qeveria në Kosovë dhe njerëzit që kam takuar gjatë 23 viteve gjithmonë më kanë pyetur se a do të shkruani libër për këtë ngjarje të rëndësishme, dhe pikërisht këtë po e bëj”, tha Walker për Insajderi.

Si e kishte përshkruar Walker këtë Masakër?

“Në një gropë mbi fshat, pashë trupin e parë. Ishte i mbuluar me një batanije dhe kur u tërhoq, pashë se nuk kishte kokë në kufomë – vetëm një rrëmujë tepër e përgjakshme në qafë. Dikush më tha se kafka ishte në anën tjetër të grykës dhe më pyeti nëse doja ta shihja. Por unë thashë, ‘Jo, e kam shumë mirë këtë histori.’ [U gjetën edhe tre trupa të tjerë.] Ata dukeshin si burra të moshuar , me flokë të thinjura ose flokë të bardha … Ata kishin plagë në kokë dhe kishte gjak në rrobat e tyre. në kokë – në majë të kokës dhe në pjesën e prapme të kokës. Një çifti kishin plagë nga plumbat që i kishin nxjerrë sytë. Më thanë se kishte trupa të tjerë më lart dhe mbi kreshtën e kodrës, dhe unë u pyet nga gazetarët dhe inspektorët nëse do të ngjitesha dhe do të shihja pjesën tjetër. Unë thashë: ‘Kam parë mjaft’”.

Në fshatin Reçak në Shtimes më 15 janar 45 civilë shqiptarë u masakruan nga forcat serbe.