Koronavirusi u mori jetën 602 personave të tjerë në 24 orët e fundit në Itali, duke e çuar bilancin total në 6 077 viktima. Mbi 3700 janë rastet e reja për një total prej më shumë se 63 900 persona të infektuar.
Shifrat mbeten alarmante, por rënia në numrin e viktimave dhe rasteve të reja për të dytën ditë radhazi po ushqen shpresën se situata po shkon drejt përmirësimit. Autoritetet e rajonit më të prekur të Lombardisë thonë se kjo është dita e parë pozitive, pasi konfirmohet trendi i uljes së rasteve dhe viktimave.
“Nuk është momenti të brohorasim fitore, por një dritë në fund të tunelit e shohim”, tha Giulio Gallera, përfaqësues i Këshillit Rajonal të Lombardisë. Autoritetet italiane kanë ashpërsuar masat, në një përpjekje të dëshpëruar për të frenuar përhapjen e virusit vdekjeprurës.
Me një dekret të ri, kryeministri Giuseppe Conte vendosi të mbyllë aktivitetet prodhuese jo të domosdoshme. Vendimi po kundërshtohet ashpër nga sindikatat në veri, të cilat premtojnë të mobilizohen në grevë të përgjithshme dhe pakënaqësi po shprehen edhe nga autoritet lokale të rajoneve të ndryshme.
Ndërkaq, sipas një raporti të Insititutit të Shëndetit Publik, që prej fillimit të epidemisë në Itali, mbi 4800 punonjës të shëndetësisë janë prekur nga Covid-19, 9% e numrit total të të infektuarëve. 24 mjekë kanë humbur jetën deri më tani.
