Aksidenti në Kroaci, shoferi e pranon se e kishte zënë gjumi në timon

Shoferi i autobusit të aksidentuar në Kroaci, gjatë marrjes në pyetje nga policia, ka pranuar se për një moment e kishte zënë gjumi ndërsa ishte duke ngarë makinën.

Kështu ka bërë të ditur zëvendësprokurori komunal Slavko Pranjic. “Shoferi i autobusit u gjet në vendngjarje ku edhe u arrestua. Një hetim është kryer, veprime tjera janë marrë për të filluar procedura penale. Deri më tani, kemi informacion se ka 10 persona të vrarë dhe 23 të plagosur rëndë ose lehtë. Shoferi u arrestua me dyshimin për drejtimin e një automjeti në mënyrë të papërshtatshme. Nuk mund të flasim për shkaqet e daljes nga rruga. Ai deklaroi se e zuri gjumi për një moment, por ne do të përcaktojmë me kohë detajet”, ka thënë Pranjic për mediat kroate.

Të paktën 10 viktima dhe mbi 45 të plagosur, është bilanci i aksidenti tragjik, të ndodhur në autostradën Slavonski-Brod në Kroaci. 8 persona të plagosur janë ende në gjendje të rëndë, ndërsa mes tyre është edhe një vajzë e mitur. Në total janë 15 të mitur të përfshirë në aksident.

Autoritetet e Kosovës janë nisur drejt Kroacisë për t’u ardhur në ndihmë , ndërsa ambasadori i Kosovës në Kroaci, Gëzim Kasapolli, i cili vizitoi spitalin ku po marrin trajtim personat e plagosur,  pohoi se pasagjerët ishin të gjithë shtetas kosovarë që jetonin në Gjermani, e qe po ktheheshin për pushime në vendlindje.