Amerika thotë se paratë e naftës, në Siri, do t’i marrin kurdët

Pentagoni thotë se të ardhurat nga fushat e naftës në verilindje të Sirisë – që mbrohen nga forcat e SHBA-së, do të derdhen për luftëtarët aleatë kurdë dhe jo në arkat e Uashingtonit.

“Të ardhurat nuk do të shkojnë në SHBA, ato do t’i derdhen SDF-së”, tha zëdhënësi i Pentagonit, Jonathan Hoffman, duke iu referuar Forcave Demokratike Siriane të udhëhequra nga kurdët.

Qëllimi është që të lejojmë SDF-në të ketë “aftësinë për të punuar në ndërtimin e forcës së tyre në fushatën për zhdukjen e ISIS-it”, shtoi Hoffmani, duke përdorur një emër alternativ për grupin terrorist të Shtetit Islamik (ISIS).

“Kështu po parandalohet ISIS-i që të marrë të ardhura nga nafta”, ka thënë ai.

SDF-ja ka qenë një aleat kryesor dhe ka marrë mbështetje ushtarake në luftën kundër IS-it në rajonin sirian afër kufirit turk.

Admirali amerikan, William Byrne, tha se kur militantët kontrollonin fushat e naftës më 2015, ata ishin në gjendje të fitonin rreth 1.5 milionë dollarë në ditë, për të ndihmuar në financimin e sulmeve në vend dhe jashtë tij.

“Ne thjesht nuk do të lejojmë që kjo të ndodhë përsëri”, tha ai.

Turqia nisi një ofensivë kundër forcave të drejtuara nga kurdët, më 9 tetor, pasi presidenti i SHBA-së, Donald Trump, njoftoi se po tërhiqte pjesën më të madhe të trupave amerikane nga Siria Verilindore.

Trumpi mori kritika për këtë vendim, pasi ai u pa si një “tradhëti” ndaj aleatëve kurdë. Megjithatë administrata e Trumpit ka thënë se disa trupa do të mbeten për të ndihmuar që resurset e naftës të mos bien në duart e militantëve të ISIS-it./rel