Arabia Saudite kalon çdo kufi: 340 ekzekutime në një vit

Arabia Saudite ka vendosur një tjetër rekord të zi për numrin e ekzekutimeve të kryera brenda një viti, siç raportojnë mediat e huaja. Mbretëria ka ekzekutuar 340 persona deri më tani gjatë këtij viti, pasi autoritetet njoftuan se tre persona u dënuan me vdekje dhe u ekzekutuan të hënën.

Ky bilanc shënon vitin e dytë radhazi që Arabia Saudite thyen rekordin e saj për ekzekutime, që kur organizatat për të drejtat e njeriut nisën të dokumentojnë këto shifra në vitet 1990. Në vitin 2024, vendi kishte ekzekutuar 338 persona.

Në një deklaratë të Ministrisë së Brendshme, të publikuar nga Agjencia Zyrtare Saudite e Lajmeve (SPA), thuhet se tre persona u ekzekutuan në Mekë, pasi ishin dënuar për vrasje. Që nga fillimi i vitit 2025, Arabia Saudite ka ekzekutuar 232 persona për vepra penale të lidhura me drogën.

Analistët e lidhin rritjen e ndjeshme të ekzekutimeve kryesisht me “luftën kundër drogës” të nisur në vitin 2023. Shumë prej të arrestuarve në fazat e para të kësaj fushate po ekzekutohen vetëm tani, pas përfundimit të procedurave ligjore dhe dhënies së vendimeve përfundimtare.

Arabia Saudite rifilloi ekzekutimet për vepra penale që lidhen me drogën në fund të vitit 2022, pasi kishte pezulluar dënimin me vdekje për këto raste për rreth 3 vjet.

Sipas vëzhguesve, të huajt po mbajnë peshën kryesore të kësaj fushate. Arabia Saudite prej dekadash mbështetet në miliona punëtorë të huaj për ndërtimin e projekteve të mëdha infrastrukturore si dhe sektorët e hotelerisë dhe shërbimeve.

Si eksportuesi më i madh i naftës në botë, Arabia Saudite është përballur vazhdimisht me kritika për dënimin me vdekje, të cilin organizatat për të drejtat e njeriut e cilësojnë si të tepruar dhe në kundërshtim të theksuar me përpjekjet e mbretërisë për të paraqitur një imazh modern në arenën ndërkombëtare.

Amnesty International ka nisur dokumentimin e ekzekutimeve në Arabinë Saudite që nga viti 1990, ndërsa të dhënat për periudhën para këtij viti mbeten kryesisht të paqarta.