Arkitekti Sadiki: Në Kosovë, xhamitë bëhen me deformime të pakuptimta

Arkitekti Arbër Sadiki, që fitoi çmim në Arabi për xhaminë në Tupallë të Medvegjës, ka thënë se xhamitë në Kosovë ndërtohen me deformime të pakuptimta, duke bërë thirrje që ndërtesat e bashkësive fetare duhet ta ndjekin frymën bashkëkohore të arkitekturës.

Sadiki të hënën fitoi çmimin “Abdullatif Al Fozan” me xhaminë e projektuar dhe ndërtuar më 2015 në Tupallë të Medvegjës. Ceremonia u mbajt në Riad të Arabisë Saudite.

Xhamia me të cilën fitoi çmimin Sadiki është pa minare. Ai thotë se edhe në vendin e origjinës së fesë islame kishin qasje bashkëkohore në ndërtimin e xhamive, por sipas tij, në Kosovë ende jo.

“Në vendin e origjinës të fesë islame kishin qasje bashkëkohore në ndërtimin e xhamive, te ne ekziston një qasje shumë e prapambetur e përsëritjes së stileve, që nuk janë as stile otomane. Janë deformime të pakuptimta që ndërtohen gjithandej, por në kuptim arkitekturor nuk kanë asnjë vlerë. Edhe ndërtesat e xhamive janë si çdo ndërtesë tjetër, duhet ta ndjekin frymën bashkëkohore të arkitekturës”, ka thënë ai në emisionin “038” të KTV-së.

Sadiki e ka cilësuar si rast të humbur për ndërtimin e një xhamie të tillë në Prishtinë, aty ku po ndërtohet xhamia e madhe. Thotë se ka pasur shumë propozime të natyrës bashkëkohore të ndërtimit të xhamive, që siç thotë ai, do ta kishin nderuar qytetarin dhe besimtarin, por që nuk fituan në konkurs.

“Edhe ndërtesat e xhamive janë si çdo ndërtesë tjetër, duhet ta ndjekin frymën bashkëkohore të arkitekturës”, ka thënë ai.

Sadiki ka thënë se gjatë katër ditë qëndrimi në kryeqytetin e Arabisë Saudite analizuan pesë xhamitë, përfshirë atë të Tupallës, që fituan çmimin “Abdullatif Al Fozan”.

“Nuk është me rëndësi çka më pëlqen mua ose jo. Është orientim botëror arkitekturor. Katër ditë që qëndrova atje, i analizuam pesë xhamitë që fituan. Aty kishte edhe përfaqësues të fesë. Edhe ata ishin dakord që arkitektura e xhamive duhet ta ndjekin arkitekturën bashkëkohore”, potencoi Sadiki.