Arrestohet një serb i dyshuar për krime lufte në Kosovë

Policia e Kosovës e ka arrestuar të martën një person në pikën kufitare midis Kosovës dhe Serbisë, në Jarinjë, nën dyshimet për krime lufte kundër popullatës civile gjatë luftës në Kosovë.

I arrestuari D.R. dyshohet për krime lufte gjatë periudhës 7-10 maj 1999 në Komunën e Gjakovës.

Sipas policisë, i dyshuari kishte vepruar në grup të organizuar si zyrtar të mobilizuar me njësi të përbëra nga Ministria e Punëve të Brendshme e Serbisë (MUP).

I dyshuari është shoqëruar në Policinë e Kosovës, ku është intervistuar në prani të avokatit të tij mbrojtës. Prokurori Special e ka ndaluar të dyshuarin për 48 orë.

Për këtë arrestim ka reaguar edhe partia serbe në Kosovë, Lista Serbe, që është ankuar se, sipas saj, personi 75-vjeçar ka qenë duke u kthyer në Kosovë për të zgjatur afatin e dokumenteve.

“D… është familjar në dekadën e tetë të jetës së tij, që, sipas djalit të vet, kurrë s’ka qenë i përfshirë në ndonjë formacion gjatë konfliktit dhe është aktualisht seriozisht i sëmurë dhe me demencë, për çka familja e tij frikësohet për kushtet psikofizike”, thuhet në reagim të Listës Serbe.