Basha paralajmëron Berishën: Boll është boll, do ta zbatoj statutin e partisë

Kryetari i Partisë Demokratike, Lulzim Basha zhvilloi ditën e sotme një takim me 71 kryetarët e degëve të PD në rrethe me të cilët ndau shqetësimet rreth debateve të fundit në parti.

Basha u tha kryetarëve të degëve se kundërshtari i përbashkët i demokratëve është Edi Rama dhe çdo përçarje mes tyre i shërben vetëm këtij të fundit.

“Rama është kundërshtari ynë i përbashkët, pavarësisht çfarë mendojmë në këtë situatë që po kalojmë. Beteja me njëri-tjetrin nuk na çon askund. I shërben vetëm Ramës dhe patericave të tij, që po bëjnë gjithçka që beteja mes nesh të çojë në një ndarje të partisë. Ju jeni dëshmitarë të kësaj”, mësohet të jetë shprehur Basha.

Ai paralajmëroi ish-kryeministrin Sali Berisha se do të marrë përgjigje në statut për “veprimet ilegjitime, tentativat për bunkerizim dhe dëmtimin e interesave elektorale dhe politike të PD”.

“Dhe do ta zbatoj statutin ndaj kujtdo. Kush shkel vendimin e Kryesisë së Partisë, fatin e ka të caktuar nga statuti i partisë, përfshirë këtu edhe Sali Berishën. Boll është boll! Asnjë anëtar nuk është mbi statutin dhe nuk është mbi të tjerët”, mësohet të jetë shprehur Basha.

Sipas tij, Berisha është duke e përdorur Partinë Demokratike si mburojë përballë SHBA.

“Kjo histori e përdorimit të demokratëve si mburojë e interesave personale të kujtdo merr fund njëherë e përgjithmonë. Kryesia e Partisë Demokratike votoi për mbledhjen e Kuvendit legjitim. Sali Berisha thotë se prapë nuk e njeh. Ku qëndron morali i statutit që me forcë ngre Sali Berisha? Çfarë po kërkon ai? Sali Berisha nuk e ka hallin te statuti Ai nuk njeh asnjë strukturë të Partisë, sepse qëllimi i tij është që partia të shndërrohet në një mburojë të tij përballë Shteteve të Bashkuara”, tha Basha.