Biden i frikësohet një shpërthimi tjetër në aeroport: Mund të ndodhë në 24-36 orët e ardhshme

Presidenti i Shteteve të Bashkuara të Amerikës, Joe Biden, deklaroi se situata në Kabul vijon të jetë shumë e rrezikshme dhe se një tjetër sulm kamikaz, si ai që vrau më shumë se 150 civilë, mund të ndodhë brenda 36 orëve të ardhshme.

“Kërcënimi për sulme terroriste në aeroport vijon të jetë i lartë. Komandantët më kanë informuar se një sulm tjetër ka shumë mundësi që të ndodhë në 24-36 orët e ardhshme. U kam thënë që të marrin të gjitha masat e mundshme për të pasur prioritet sigurinë e trupave tanë”, deklaroi Biden.

Presidenti amerikan theksoi se sulmi me dron ndaj ISIS-K, ku sipas Pentagonit janë vrarë dy persona me peshë të këtij grupimi, nuk do të jetë i fundit.

“Thashë që do t’i gjenim personat përgjegjës për sulmin kamikaze ndaj trupave tanë dhe civilëve të pafajshëm në aeroport dhe këtë gjë bëmë. Ky sulm nuk është i fundit. Do të vazhdojmë të ndjekim çdo person të përfshirë në atë sulm të tmerrshëm dhe ata do të paguajnë për atë që bënë”, tha Biden.