Çdo të thotë goditja e “Moskva”-s nga ukrainasit?

Një analist e përshkruan si një fitore “simbolike, por edhe ushtarake” “goditjen” që pretendohet se ukrainasit ia dhanë kryqëzorit raketor rus “Moskva”, në Detin e Zi.

Sipas profesor Michael Petersen, Drejtor i Studimeve Detare Ruse në Kolegjin e Luftës Detare të SHBA, “megjithëse është shumë herët për të ditur se çfarë ndodhi, goditja e ‘Moskva’-s tregon se ukrainasit arritën një fitore jo të parëndësishme në det” e cila “ka karakter simbolik por edhe ushtarak”, pasi “’Moskva’ ishte anija kryesore e flotës ruse në Detin e Zi.

Sipas Petersen, i cili foli në Radio BBC, ukrainasit janë dobësuar nga pikëpamja detare që nga viti 2014, gjatë operacioneve ruse për aneksimin e Krimesë dhe për rrjedhojë, goditja e “Moskva”-s ka “rëndësi simbolike, pasi tregon se Ukraina mund të arrijë ende sukses ushtarak”.

Profesori thotë se “goditja” në anijen ruse mund të ketë një kuptim ushtarak, pasi mund të “detyrojë” rusët të hapin më shumë fronte të operacioneve të tyre dhe kështu “të ndikojë në aftësinë e tyre për të siguruar mbulimin e nevojshëm për trupat”.

Kryqëzori kryesor detar i Marinës Ruse nga Flota e Detit të Zi, “Moskva” (Moska), pësoi “dëmtime serioze” pasi një pjesë e municionit u shpërthye në kuvertën e saj pas një zjarri, sipas një deklarate të lëshuar nga Ministria ruse e Mbrojtjes.

“Për shkak të zjarrit, në Moskë ka ndodhur një shpërthim i municionit, të cilin e mbante. Anija është dëmtuar rëndë. Ekuipazhi u evakuua”, tha Ministria e Mbrojtjes, sipas agjencive ruse të lajmeve TASS, RIA Novosti dhe Interfax. Agjencitë nuk e specifikuan pozicionin e kryqëzorit. Ndërsa zyrtarët ukrainas thanë më herët se kryqëzori rus ishte goditur nga raketat e lëshuara prej tyre.

“Raketat Neptun që mbrojnë Detin e Zi kanë shkaktuar dëme të mëdha në këtë anije ruse,” tha Maxim Martchenko, guvernatori ukrainas i rajonit të Odessa-s.

Më 24 mars, një muaj pas fillimit të pushtimit rus të Ukrainës, marina ukrainase thuhet se shkatërroi “Saratov”, një maune detare ruse e ankoruar në portin e Berdyansk-ut, afër Mariupol-it, në Detin Azov. Por Moska nuk ka konfirmuar raportet se “Saratov”-i është shkatërruar. Ushtria ruse rrallë raporton për viktimat e saj në luftë.