Çka tha Agim Veliu në Klan, deklaratë për të cilën e shkarkoi kryeministri Kurti

Ministri tashmë i shkarkuar, Agim Veliu, u deklarua dje në Klan Kosova PRO shpalljes së Gjendjes së Jashtëzakonshme të cilën e propozoi presidenti Hashim Thaci.

Veliu thoshte se numri po shkon duke u rritur dhe duhet marrë masa, qofshin ato edhe ekstreme, shkruan Reporteri.net

“Situata në Kosovë është serioze. Numri i të prekurve po rritet. Institucionet duhet t’i ndërmarrin të gjitha veprimet e nevojshme në mënyrë që ta parandalojnë këtë pandemic. Unë personalisht jam që të ndërmerren të gjitha masat. Qofshin ato edhe ekstreme, sikurse po quhen, që të mbrohemi nga ky rrezik që e ka përfshirë globin, por edhe Kosovën. Presidenti i Republikës ka propozuar që është mirë të bëhet gjendje e jashtëzakonshme, duke e pasur parasysh rritjen e numrit. Ai e shfrytëzon të drejtën e tij kushtetuese që ta paraqesë dekretin. Janë deputetët ata që e thonë fjalën e tyre, me votën pro ose kundër”, ka thënë Agim Veliu në Klan Kosova, e cila deklaratë solli shkarkimin.

E për këtë gjë, Veliu u shkarkua nga kryeministri Albin Kurti, i cili ishte kundër kësaj mase të cilën Qeveria e tij e quajti ekstreme, shkruan Reporteri.net.

Në arsyetimin për shkarkim, Kurti përmend edhe përhapje paniku nga tashmë ish-ministri Veliu.

“Mbrëmë vonë, pas mesnate, Ministri i Punëve të Brendshme dhe Administratës Publike, z. Agim Veliu, për televizionin Klan Kosova, u deklarua kundër qëndrimit të Kryeministrit të Republikës së Kosovës mbi shpalljen e gjendjes së jashtëzakonshme. Ai, gjithashtu, në këtë deklarim, përhapë panik duke thënë se “numri i të prekurve po rritet prej ore në orë”. As Ministria e Shëndetësisë e as Instituti  Kombëtar i Shëndetësisë Publike nuk thanë që numri i të infektuarve me COVID-19 po rritet nga ora në orë. Në këto momente, kur e gjithë administrata publike po bën përpjekje maksimale për të minimizuar dëmet nga virusi Korona, udhëheqësit e institucioneve qendrore, përfshirë këtu anëtarët e kabinetit qeveritar duhet të demonstrojnë maturi si në vendime ashtu edhe deklarime. Përmes deklaratave të tij të bëra publikisht, por jo edhe të mbështetura me qëndrime të tij në mbledhje të brendshme, Ministri i Punëve të Brendshme dhe Administratës Publike, z. Veliu ka dëshmuar mungesë të theksuar lidershipi dhe ka minuar hapur punën e qeverisë, pjesë e të cilës ai është. Ai, gjithashtu, në këtë deklarim, përhapë panik duke thënë se “numri i të prekurve po rritet prej ore në orë””, thuhet në vendimin e Kurtit.