Ministri i Financave, Punës dhe Transfereve, Hekuran Murati ka shpalosur detaje të reja rreth keqpërdorimit me shpronësime, të qeverisë Haradinaj të cilës i ka bërë kallëzim penal në Prokurorinë Speciale.
Në një postim në Facebook Murati ka treguar se si toka që ishte privatizuar me 6 euro arin nga AKP-ka ishte vlerësuar 600 fish më shumë në procesin e shpronësimit.
Po ashtu, sipas Muratit Qeveria Haradinaj kishte marrë vendim më 17 dhjetor 2019, që të njëjtën tokë t’a shpronësojë për njëmijë e dyqind fishin e çmimit të privatizimit.
Postimi i plotë i Muratit në facebook
Toka që AKM/AKP e kishte privatizuar për 6 euro/arin, në tabelat e vlerësimit të dorëzuara me 17 maj në MMPH, ishte vlerësuar me 3,700 euro/ari, pra rreth 600-fishi i çmimit të blerjes.
Por sikur të mos mjaftonte kjo, Qeveria Haradinaj kishte marrë vendim me 17 dhjetor 2019, që të njëjtën tokë t’a shpronësojë për 7,500 euro/ari, pra 1,200-fishi (me fjalë: njëmijë e dyqind fishi i çmimit të privatizimit).
Sipërfaqja e tërësishme e tokës, e cila për t’u privatizuar kishte kushtuar 4,000 (katër mijë) euro, tani do të shpronësohej për 4,866,000 (katër milionë e tetëqind e gjashtëdhjetë e gjashtë mijë) euro.
Pra nga 43 milionëshi i tërësishëm, një person i vetëm do të merrte 4.9 milionë euro, nëse keqpërdorimi do të shkonte deri në fund. Fatmirësisht, e stopuam me kohë.
Fakte si kjo, ka edhe shumë të tjera. Krejt çka nevojitet është veprimi i prokurorisë dhe organeve të rendit.
