Dikur miq, kush është shqiptari që u vra nga fqinji italian pasi i sulmoi shtëpinë me fadromë

Gëzim Dodoli, 59 vjeç, është shqiptari i cili mbeti i vrarë mbrëmjen e së enjtes në Itali nga fqinji i tij.

Ai jetonte i vetëm në ato kodra në periferi të Arezzo. Gruaja dhe dy fëmijët e tij jetojnë në Seveso të Lombardisë.

Trupi i 59-vjeçarit që ndërroi jetë tashmë ndodhet në spitalin Le Scotte në Siena. Prokurorja Laura Taddei po zhvillon hetimin e çështjes.

Familja në darkë gjatë sulmit me fadromë

Familja e 53-vjeçarit Sandro Mugnai, autorit të vrasjes, po darkonte kur Gëzim Dodoli, 59-vjeçari shqiptar, ishte gati të prishte me fadromë vilën në San Polo, në kodrat e Arezzos.

Sapo 53-vjeçari dëgjoi zhurmën e shtypjes së makinave nga fadroma e fqinjit dhe goditjen e parë në shtëpi me kovën e fadromës, Sandro Mugnai mori armën e gjahut dhe qëlloi pesë herë.

Katër prej plumbave goditën punëtorin shqiptar, i cili gjeti vdekjen në vend.

Avokatët e Sandro Mugnait do të fokusohen te vetëmbrojtja

Sandro Mugnai ndodhet aktualisht në burgun e Arezzo-s, në pritje të seancës për të vërtetuar paraburgimin nga gjyqtarja hetuese e gjykatës së Arezzos, Giulia Soldini, e caktuar për të hënën më 9 janar në orën 12.

53-vjeçari pati sot një vizitë nga avokatët e tij Marzia Lelli dhe Piero Melani Graverini.

Avokatët kanë bërë të ditur se do të fokusohen tek akti i vetëmbrojtjes.

Goditjet e shkaktuara në çati e kanë bërë shtëpinë të papërdorshme, e cila mund të ishte shembur dhe të shkaktonte vdekjen e banorëve që ishin brenda saj.

Dikur miq

Në brendësi të shtëpisë, teksa punëtori shqiptar po fillonte të prishte shtëpinë, ndodhej Sandro Mugnai, gruaja e tij, një nga fëmijët e tij dhe të afërm të tjerë.

Mes dy fqinjëve, të cilët dikur ishin miq shumë të ngushtë, kishin lindur mosmarrëveshje të shumta për volumin e muzikës, erërat e supozuara të këqija që vinin nga tubat dhe për kufijtë e tokës, për të cilat tashmë kishte pasur një ankesë.

Përkundër këtyre episodeve në asnjë rast nuk ishte menduar se ato mund të çonin në një fund kaq tragjik.