Dy avionë të qeverisë ruse morën 70 diplomatë të dëbuar nga Bullgaria dhe familjet e tyre të dielën dhe u nisën nga Sofja për në Moskë.
Lajmi u bë i ditur nga “Euractiv”.
Sipas shtypit bullgar, numri i përgjithshëm i pasagjerëve që janë larguar nga vendi është mbi 180 persona.
Ajo që ra në sy ishte fakti që diplomatët mbanin bluza të stampuara me portretin e presidentit rus Vladimir Putin.
Të enjten e kaluar, Bullgaria shpalli persona non grata 70 diplomatë rusë, dëbimi më i madh që kur Britania dëboi 105 diplomatë sovjetikë gjatë Luftës së Ftohtë në vitin 1971.
Jo të gjithë nga 70 të dëbuarit thuhet se janë diplomatë, me disa që janë staf teknik si kuzhinierë, shoferë ose kopshtarë.
Ndër diplomatët rusë të dëbuar që shkuan në Moskë ishte numri dy i ambasadës ruse, Philip Voskresenskyi, i cili deklaroi se asnjë nga rusët “të dëbuar ilegalisht dhe paturpësisht” nuk ka punuar kundër Republikës së Bullgarisë.
Zëdhënësja e Ministrisë së Punëve të Jashtme ruse, Maria Zakharova, theksoi se Bullgaria e zvogëloi mundësinë e funksionimit të ambasadës ruse në Sofje “në minimum, madje në zero”.
Më herët, zëvendësministri i Jashtëm rus Oleksandr Hrushko paralajmëroi se Moska duhet të vendosë nëse do të mbajë apo mbyllë praninë diplomatike ruse në Bullgari.
Kryeministri në largim i Bullgarisë Kiril Petkov njoftoi dëbimin e 70 punonjësve të ambasadës ruse nga vendi për shkak të aktivitetit të spiunazhit.
Rusia më pas lëshoi një ultimatum, duke kërcënuar se do të mbyllte ambasadën ruse nëse Sofja zyrtare nuk anulonte dëbimin deri në mesditën e së premtes.
Petkov hodhi poshtë ultimatumin rus, duke thënë se sjellja e Rusisë ishte e papranueshme.
