Gazetari i A2 CNN, Erald Kodheli, i cili po ndjek kombëtaren kuqezi në rrugëtimin e saj në Euro 2024 ka sjellë dhe disa detaje të reja nga zhvillimet brenda kampit të të besuarve të Sylvinhos.
Kështu, sipas burimeve të gazetarit Kodheli, trajneri brazilian do të bëjë dy ndryshime të sigurta në formacionin përballë Kroacisë. Një prej tyre është Hysaj, teksa tjetri Seferi, ndërkohë që lajme të mira vijnë dhe nga rikuperimi i Berishës.
“Elseid Hysaj pas kritikave të shumta të marra pas golit të parë, por edhe atij të dytë, nuk do të jetë titullar, zëvendësohet nga Ivan Balliu. Taulant Seferi do t’i lerë vendin Arbër Hoxhës. Etrid Berisha është stërvitur normalisht, nuk ka dhimbje në shpinë dhe mund të zëvendësojë Strakoshën. Ndoshta është momenti që edhe Ismajli të kthehet në formacion përballë një Kroacie të frikshme”, u shpreh Kodheli.
