Fjalimi i Biden në Varshavë: Putin mendon se është i fortë, ai nuk do ta rindërtojë perandorinë

Pas vizitës surprizë të djeshme në Kiev, ku u takua me presidentin ukrainas, Volodymyr Zelensky, presidenti amerikan Joe Biden ka mbajtur fjalimin e tij në kryeqytetin polak të Varshavës, pak orë pas fjalimit të Vladimir Putin në Moskë, ku presidenti rus akuzoi perëndimin si shkaktar i situatës në Ukrainë.

Biden i kujtoi të gjithëve se “një vit më parë i frikësoheshim rënies së Kievit, por Kievi po reziston me forcë dhe vijon të jetë e lirë. Bota nuk e ka kthyer kokën pas”, deklaroi Biden përballë kështjellës së Varshavës, duke shtuar madje se “demokracitë e botës janë edhe më të forta, ndërkohë që autokratët po humbin fuqi”, dhe duke nënvizuar se artikulli 5 i solidaritetit midis vendeve të NATO në rast sulmi është plotësisht në fuqi.

Sipas Biden, Putin dëshiron të rindërtojë perandorinë ruse por nuk do t’ia dalë. “Ukraina nuk do të jetë kurrë një fitore për Rusinë”, ishin fjalët e tij.

Duke iu përgjigjur akuzave të Putin, presidenti amerikan nënvizoi se “SHBA nuk dëshiron të shkatërrojë Rusinë. As ta sulmojë. Lufta është tragjedi dhe është një vendim i Putin”, duke dhënë edhe lajmin se samiti i vitit të ardhshme i NATO do të zhvillohet pikërisht në Shtetet e Bashkuara të Amerikës.