Flet çifti që theu xhamin e autobusit dhe shpëtoi nga aksidenti tragjik në Bullgari

Mes shtatë të mbijetuarve nga aksidenti i sotëm në Bullgari, është edhe një çift shqiptar.

Lulëzim Sylejmani nga Presheva dhe Medina Tufiu nga Sopoti i Kumanovës janë mes të mbijetuarve dhe po trajtohen në një spital të Sofjes.

Medina në një intervistë për televizionin Alsat-M, ka thënë se ata shpëtuan falë të fejuarit të saj, që ishte i zgjuar dhe në momentin që pa se autobusi u përfshi nga flakët, e theu xhamin anësor dhe e nxori atë.

Në aksidentin e sotëm, humbën jetën 46 persona, shumica shqiptarë nga Maqedonia e Veriut. Ata po ktheheshin nga Stambolli me një autobus të një kompanie shqiptare.

“Kam qenë në gjumë, edhe veç kur i kam pa duke bërtitur njerëzit. E kam pasur një njeri përmbi mua. Ky (i fejuari) thirrke, nuk e di se si kam dalë jashtë, i kam dhënë zor dhe kam kërcyer”, ka thënë ajo.

Në fakt, i fejuari i saj ishte i pari që doli nga xhami pasi e theu atë. Pas tij dolën edhe tre të tjerë, kurse më pas e fejuara e tij, Medina.

“Kam qenë i vetmi në autobus nga udhëtarët që isha zgjuar, krejt rastin e kam pa me sy. Autobusi pas 20 metrave u ndal, dilte tym, kishte panik, bërtitshin njerëzit, për fat të mirë e kam marrë çekanin dhe e kam thyer xhamin, kam zbritur unë, pastaj 3 të tjerë e më pas nusja. E kam bartur 150 metra, pasi kishte të thyera gjymtyrët, dëgjoja njerëzit duke bërtitur”, ka thënë Lulëzimi për Alsat-M.