Gjini: Unë po pi kafe me Florentin, nuk duhet të ketë vend për kurrfarë diskriminimi

Kryetari i Komunës së Gjakovës, Ardian Gjini, ka reaguar pasi që ministri i Administrimit dhe Pushtetit Lokal, Elbert Krasniqi, ka bërë thirrje që të bojkotohen lokalet ku nuk u shërbehet komuniteteve, ku edhe ka treguar një rast të tillë që ka ndodhur së fundi në qytetin e Gjakovës.

Gjini sot ka publikuar një fotografi me një të ri nga komunitetet RAE, të cilin thotë se e ka mik.

I pari i Gjakovës ka thënë se nuk duhet të ketë vend për kurrfarë diskriminimi, gabime të tilla ai thotë se i kushtojnë të gjithë shoqërisë.

“Unë po pi kafe me Florentin! Florenti është një djalë i jashtëzakonshëm, mik dhe mbështetës i imi në zgjedhjet e fundit. Në vendin tonë nuk duhet të ketë vend për kurrfarë diskriminimi. Le të nxjerrim mësim të gjithë dhe të mos i përsërisim gabimet. Na kushtojnë të gjithëve”, shkroi ai në Facebook.