“Groenlanda”, Trump kërcënon me tarifa/ Paralajmëron vendet që nuk e mbështesin në synimin për kontrollin në ishull

Donald Trump I ka të qarta synimet e tij në lidhje me Groenlandën dhe mund të vendosë tarifa për vendet që nuk bien dakord me të.

Presidenti amerikan deklaroi se mund të ndëshkojë ekonomikisht shtetet që kundërshtojnë ambicien e tij për të bërë ishullin pjesë të shteteve të bashkuara.

“Mund të vendos një tarifë për vendet që nuk bien dakord për Groenlandën, sepse ne kemi nevojë për të për sigurinë kombëtare, kështu që mund ta bëj diçka të tillë”

Tarifat kanë qenë arma e preferuar ekonomike për Donald Trump që pas rikthimit të tij në detyrë një vit më parë.

Ambiciet e tij për Groenlandën kanë shqetësuar aleatët europianë të Uashingtonit, të cilët kanë paralajmëruar se një ndërhyrje në ishull mund të jetë fundi I NATO-s.

Komentet e Trump erdhën teksa një delegacion dypartiak nga Kongresi Amerikan vizitoi Danimarkën.

Delegacioni prej 11 anëtarësh, i udhëhequr nga senatori demokrat Chris Coons, u takua me kryeministren daneze Mette Frederiksen dhe homologun e saj të Groenlandës, Jens-Frederik Nielsen, si dhe me parlamentarë danezë dhe të Groenlandës, me premtimin se do të përpiqen të ulin tensionet pasi të rikthehen në Shtetet e Bashkuara.

Ligjvënësit si nga Partia Republikane e Trump ashtu edhe nga demokratët kanë thënë se do të mbështesin legjislacionin për të kufizuar Trump për të pushtuar Grenlandën.

Por kjo nuk është garanci e mjaftueshme për Europën, e cila ka filluar të veprojë në mbrojtje të ishullit.

Kryeministrja e Italisë, Giorgia Meloni, i kërkoi NATO të ketë një prani të koordinuar në rajonin e Arktikut për të parandaluar tensionet dhe për t’iu përgjigjur “ndërhyrjes nga aktorë të tjerë”.

Meloni tha se rajoni po bëhej gjithnjë e më i rëndësishëm për shkak të zhvillimit të rrugëve të reja detare dhe burimeve të tij të mëdha të energjisë dhe mineraleve.