Gucati nuk e dëgjon thirrjen e Veselit: Protesta do të mbahet me 9 korrik

Kryetari i Organizatës së Veteranëve të Luftës së Ushtrisë Çlirimtare të Kosovës, Hysni Gucati, përmes një shkrimi ka njoftuar se protesta e organizuar nga OVL e UÇK’së do të mbahet me 9 korrik.

Përkundër asaj që kryetari i Partisë Demokratike të Kosovës, Kadri Veseli, bëri thirrje të mos mbahet protesta për shkak të gjendjes së pandemisë që ka shkaktuar koronavirusi, Gucati njoftoi se megjithatë protesta do të mbahet.

Gucati the se ky vendim erdhi pasi kështu vendosi Këshilli Drejtues dhe Kryesia e OVL e UÇK’së.

Tutje, ai tha se përmes kësaj proteste do t’i dalin në mbrojtje të gjithë veteranëve të UÇK’së dhe premtoi se nuk do të rrezikojnë jetën e qytetarëve duke respektuar rregullat e institucioneve shëndetësore.

Gucati njoftoi se protesta do të mbahet me 9 korrik në ora 12:00.

“Organizata e Veteranëve të Luftës së Ushtrisë Çlirimtare të Kosovës vepron në bazë të vendimeve që i merr Këshilli Drejtues dhe kryesia e saj, lidhur me protestën e paralajmëruar me 9 korrik në Prishtinë në ora 12:00, ne do të veprojmë siç është me së miri dhe me së drejti duke i dalur në mbrojtje gjithmonë ish-ushtarëve të UÇK-së, nuk do të rrezikojmë jetën e asnjë qytetari, shëndeti i qytetarëve është mbi të gjitha, OVL e UÇK-së i ka strukturat e saj që vendosin se si të veprojë!”, njoftoi Gucati.

Kadri Veseli u ka kërkuar Organizatës së Veteranëve të Luftës që të anulojnë protestën e paralajmëruar më 9 korrik.

Veseli përmes një video-mesazhi ka kërkuar anulimin e protestës për shkak të pandemisë, raporton Gazeta Express.

“Falemnderit nga zemra bashkëluftëtarëve të mi dhe të gjithë qytetarëve për mbështetjen e pakursyer. Por, në këtë kohë të pandemisë, kemi shqetësim jetën e qytetarëve. Prandaj, me kërkesën më të sinqertë, i lus ata që ta anulojnë protestën e paralajmëruar për 9 korrik”, ka thënë Veseli.

OVL-UÇK ka thirrur protestë gjithëpopullore në Prishtinë në kundërshtim të Gjykatës Speciale pas ngritjes së aktakuzave nga Prokurori Special ndaj Presidentit Thaci dhe Kryetarit të PDK’së, Kadri Veseli, të cilat pritet të konfirmohet apo edhe të hudhen poshtë nga gjykatësi i Dhomave të Specializuara.