Hoti: S’ka gjendje të jashtëzakonshme, jemi për masa rigoroze

Kryeministri i Kosovës, Avdullah Hoti, në konferencë për media, tha se në mbledhjen e Këshillit të Sigurisë, janë dakorduar që të merren me masat rigoroze, dhe jo gjendjen e jashtëzakonshme.

“Ne kemi diskutuar për dy skenare të mundshme, skenari i parë, zbatim shumë rigoroz të masave, skenari i dytë, shpallja e gjendjes së jashtëzakonshme. Ne jemi për skenarin e parë, për masat rigoroze, qytetarët t’i zbatojnë dhe ne t’i mbikqyrim”, tha Hoti.

Hoti tha se do të vazhdojnë t’i kontrollojnë qytetarët nëse janë duke i zbatuar masat e vendosura nga qeveria.

Ai tha gjithashtu se mundësinë për shpallje të gjendjes së jashtëzakonshme e lënë të hapur.

“Shkojmë momentalisht me skenarin e parë, me masat rigoroze, e lëmë të hapur mundësinë për shpallje të gjendjes së jashtëzakonshme. Gjatë kësaj kohe do të kemi strategji agresive mediale, sepse del që 30 për qind e qytetarëve besojnë që COVID-19, nuk është problem serioz”, u shpreh Hoti