I dërguari i Shtëpisë së Bardhë dënon rrjedhjen e inteligjencës mbi Iranin

I dërguari i Presidentit të SHBA-ve, Donald Trump në Lindjen e Mesme, Steve Witkoff, ka kritikuar rrjedhjen e informacionit të klasifikuar amerikan që sugjeronte se dëmi i shkaktuar nga sulmet e së shtunës amerikane në tre lokacione bërthamore iraniane ishte i kufizuar.

Kjo, duke i quajtur burimet “tradhtare” në një intervistë me Fox News të martën në mbrëmje.

Shtatë persona të informuar mbi një vlerësim të hershëm të inteligjencës amerikane i thanë CNN se programi bërthamor i Iranit ishte vetëm disa muaj prapa nga sulmi amerikan, pavarësisht përdorimit të 14 bombave të mëdha “bunker buster” në bastisje.

Analiza amerikane e dëmit në lokacione dhe ndikimi i sulmeve në ambiciet bërthamore të Iranit është duke vazhduar dhe mund të ndryshojë ndërsa më shumë inteligjencë bëhet e disponueshme.

Duke folur me prezantuesen e Fox News, Laura Ingraham, të martën, Steve Witkoff tha “është e qartë se rrjedhja e këtij lloj informacioni, çfarëdo informacioni, çfarëdo faqeje që del, është e papranueshme, është tradhti”.

“Pra, duhet të hetohet dhe kushdo që e bëri, kushdo që është përgjegjës për të duhet të mbahet përgjegjës”.

Duke folur për CNN për raportin ekskluziv, dy nga personat e njohur me vlerësimin thanë se rezervat e uraniumit të pasuruar të Iranit nuk u shkatërruan.

Një nga personat tha se centrifugat janë kryesisht “të paprekura”.

Një burim tjetër tha se inteligjenca vlerësoi se uraniumi i pasuruar ishte zhvendosur nga vendet para sulmeve amerikane.

Trump të martën e hodhi poshtë raportin si “lajm të rremë”, ndërsa Witkoff, duke folur për Fox, e quajti atë “plotësisht absurd”.

“Nuk ka dyshim se [aftësia bërthamore e Iranit] u zhduk. Pra, raportimi atje që në disa mënyra sugjeron se ne nuk e arritëm objektivin është thjesht plotësisht absurd”, tha ai.