Incident gjatë parakalimit të maturantëve serbë në sheshin “Car Lazar”, intervenon policia

Maturantët serbë sot dolën në sheshin “Car Llazar” në Mitrovicën e Veriut duke parakaluar me flamuj të Serbisë.

Për këtë çështje ka shkruar në Facebook, drejtuesi i “Demokracisë serbe”, Alleksandar Arsenijeviq, i cili tha se disa shqiptarë të ulur në kafene kishin provokuar serbët duke ua bërë “shqiponjën dykrenare” me duar.

Siç shihet në pamjet e publikuara nga vetë Arsenijeviq, aty më pas ka intervenuar Policia e Kosovës.

Pamjet e publikuara janë pa zë, dhe nuk mund të vërtetohet nëse ka pasur ndonjë thirrje paraprake nga njëra apo pala tjetër.

Zëdhënësi i Policisë për këtë rajon, Veton Elshani, për Klankosova.tv ka deklaruar se gjatë festimit të maturës pati provokime.

Ai tha se policia ka qenë aty për të mos lejuar që situata të eskalojë.

“Gjatë festimit të maturës ka pasë provokime dhe për të mos ardhë deri te eskalimi i situatës, policia ka reaguar”.

“Situata është qetësuar dhe maturantët kanë vazhduar festën e tyre pa pasë nevojë për reagim shtesë”, tha Elshani.

Ndonëse Arsenijeviq ka deklaruar se një maturant është arrestuar, këtë policia nuk e ka konfirmuar.

Një skenë tjetër nga ky rast është publikuar, ku shihen pjesëtarë të Policisë së Kosovës që e kanë kapur një të ri, të cilit i kërkojnë të mos provokojë.

I njëjti më pas lihet i lirë. /Klankosova.tv