Isa Mustafa bashkë me Vjosa Osmanin paralajmëron takim me Albin Kurtin

Kryetari i Lidhjes Demokratike të Kosovës, Isa Mustafa, është deklaruar përsëri, pas përfundimit të numërimit preliminar të votave të zgjedhjeve të parakohshme të 6 tetorit.

Ai ka refuzuar ta njohë Lëvizjen Vetëvendosje si fituese të zgjedhjeve, duke thënë se rezultati do të dihet kur të përfundojë numërimi i plotë i krejt votave.

Mustafa ka paralajmëruar se, bashkë me kandidaten e LDK’së për kryeministre, do të takohet me kreun e VV’së, Albin Kurti.

“Qytetarë të nderuar Në zgjedhjet e 6 tetorit LDK mori përkrahje të gjerë nga qytetarët tanë. Qytetarët ndëshkuan ata që qeverisën keq”, ka shkruar Mustafa në Facebook.

“Në një garë tepër të ngushtë, 50:50, fituesi, LDK apo VV, do të dihet përfundimisht pasi të përfundon numërimi i plotë i të gjitha votave”, ka theksuar ai.

“Këto ditë, së bashku me kandidaten tonë për kryeministre, znj. Vjosa Osmani, do të takohemi me Kryetarin e Lëvizjes Vetëvendosje, z. Kurti për të vlerësuar procesin zgjedhor dhe mundësitë e bashkëqeverisjes”, ka deklaruar Mustafa.

“Do të vazhdojmë aty ku e kemi lënë para fillimit të procesit zgjedhor, duke respektuar vullnetin e qytetarëve të shprehur me votë të lirë në një proces demokratik zgjedhor por edhe interesin e LDK-së. IM”, ka përfunduar ai.