Publicisti dhe ish ushtari i batalionit “Atlantiku”, Uk Lushi, përmes një shkrimi dërguar gazetës “Bota sot”, ka reaguar ndaj Goran Radosavljeviçit të cilin e quan vrasës serbë, pasi ky i fundit ka dhënë një intervistë për REL.
Lushi thotë se njëjtë si ky kanë folur edhe kriminelët tjerë që i ka targetuar Amerika si Millosheviqi, Hysseini, Bin Ladeni dhe Noriega.
“Senati dhe Shtëpia e Bardhë do të përfshihen shumë shpejt në proces dhe mandej Guri dhe njerëzit e skuadrës së tij vrasëse do t’i kenë vetëm dy alternativa: 1) të vetëvriten ose 2) të shtrijnë qafën para dënimit të shpatës së drejtësisë”, ka thënë Lushi.
Më poshtë shkrimi i plotë:
“Nuk jam i shqetësuar”, paska deklaruar Goran Radosavljević- Guri për Radion Evropa e Lirë në lidhje me rezolutën e miratuar nga Dhoma e Përfaqësuesve, me të cilën kërkohet të zgjidhet rasti i vrasjes së tre vëllezërve Bytyçi, Yllit, Agronit dhe Mehmetit, të tre shtetas amerikanë.
“Edhe në të kaluarën kanë miratuar rezoluta. Jam i lodhur nga komentimet”, paska shtuar ish-shefi i xhandarmërisë serbe Goran Radosavljević- Guri.
Por kështu si vrasësi serb Guri, pak a shumë, kanë folur edhe kriminelë të tjerë që i ka targetuar Amerika si p.sh. kryetari i Gurit Slobodan Milošević, Saddam Husseini, Osama Bin Ladeni apo Manuel Noriega. Dhe të të gjithë kanë përfunduar në duart e drejtësisë amerikane.
Goran Radosavljević- Guri dhe ndihmësit e tij e kanë vonuar goditjen e shpatës së drejtësisë (amerikane), por ajo do t’i gjejë dhe do t’i vendosë para gjykatësve nëse nuk përgjigjen.
Senati dhe Shtëpia e Bardhë do të përfshihen shumë shpejt në proces dhe mandej Guri dhe njerëzit e skuadrës së tij vrasëse do t’i kenë vetëm dy alternativa:
1) të vetëvriten
ose
2) të shtrijnë qafën para dënimit të shpatës së drejtësisë.
