John Bolton: Kërcënimi i Trump për tërheqje nga NATO duhet të merret shumë seriozisht

Ish-këshilltari i sigurisë kombëtare i Donald Trump, John Bolton thotë se kërcënimi i Donald Trump për t’u tërhequr nga NATO duhet marrë seriozisht. Sipas tij, presidenti i zgjedhur amerikan nuk i beson NATO-s dhe se nuk e kupton parimin e një aleance mbrojtëse.

Pavarësisht retorikës së fortë të Trump, ai tha se njerëzit duhet ta marrin kërcënimin e tërheqjes së NATO-s “shumë seriozisht”.

“Ai në thelb mendon se ne po mbrojmë Evropën, nuk marrim asgjë prej saj. Ata nuk paguajnë asgjë. Çfarë ka për ne? Është e njëjta pikëpamje që ai ka me aleancat tona me Korenë e Jugut dhe me Japoninë. Unë jam shumë i shqetësuar për këtë.Tani evropianët dhe shumë të tjerë thonë “por ne jemi afër të paguajmë 2% të PBB-së sonë për mbrojtjen – për të cilën u zotuam, meqë ra fjala, dhjetë vjet më parë në një samit të NATO-s” dhe që shumë nuk e kanë arritur ende. Unë mendoj se SHBA do të duhet të rrisë shpenzimet e saj të mbrojtjes në diçka afër nivelit të epokës së Reganit (4/5%). Kjo do të thotë se Evropa do të duhet të shkojë deri në 3%.”, u shpreh Bolton.