Kadri Veseli u përgjigjet akuzave të Prokurorit të Specializuar se ai dhe Thaçi e penguan Specialen

Kryetari i Partisë Demokratike të Kosovës, Kadri Veseli ka mohuar se ai dhe presidenti Thaçi kanë bërë një fushatë të fshehtë për të penguar punën e Dhomave të specializuara të Kosovës.

“Dyshimet e ngrituara janë plotësisht të pavërteta nuk qëndrojnë. Nuk ka kurrfar baze për pretendimin për pengim të punës së gjykatës”, ka thënë Veseli në konferencë për media.

Zyra e Prokurorit të Specializuar ka njoftuar se presidenti i Kosovës Hashim Thaçi dhe Kadri Veseli janë personat e partë që paraqiten në Gjykatën Speciale. Në njoftim thuhet se presidenti Thaçi dhe kryetari i PDK-së, Kadri Veseli kanë bërë një fushatë të fshehtë për të penguar punën e Dhomave të specializuara të Kosovës.

Sipas njoftimit të Dhomave të Specializuara, Thaçi dhe Veseli kanë vendosur interesat e tyre personale përpara gjetjes të së vërtetës, sundimit të ligjit dhe të gjithë njerëzve të Kosovës.

“Prokurori i Specializuar e ka konsideruar të domosdoshme lëshimin e këtij njoftimi publik të akuzave për shkak të përpjekjeve të përsëritura të Hashim THAÇI dhe Kadri VESELI për të penguar dhe minuar punën e KSC. Z. THAÇI dhe Z. VESELI besohet se kanë kryer një fushatë të fshehtë për të rrëzuar ligjin për krijimin e Gjykatës dhe përndryshe pengojnë punën e Gjykatës në përpjekje për të siguruar që ata të mos përballen me drejtësinë. Duke ndërmarrë këto veprime, Z. THAÇI dhe Z. VESELI kanë vendosur interesat e tyre personale përpara viktimave të krimeve të tyre, sundimit të ligjit dhe të gjithë njerëzve të Kosovës”, thuhet në njoftim.