“Kam ngadalësuar plakjen”, gjetjet e shkencëtarit që po jeton nën ujë

Që prej 1 marsit, shkencëtari amerikan Joseph Dituri, një oficer i marinës amerikane në pension dhe drejtor i Bordit Ndërkombëtar të Mjekësisë Nënujore ka jetuar në një kapsulë 100 metra katrorë, të vendosur në një thellësi 6 m në Oqeanin Atlantik.

Synimet janë tërësisht shkencore dhe objektivi për të qëndruar 100 ditë nën ujë pothuajse është duke u arritur, duke thyer çdo rekord të mëparshëm.

Në faqen e tij në Instagram, Joe përditëson ndjekësit për ecurinë e eksperimentit që synon studimin e ndikimit të një mjedisi nën presion në trupin e njeriut për një periudhë të gjatë kohore.

“Kam ngadalësuar plakjen e trupit me 20%”, deklaroi ai duke ekspozuar rezultatet e para të analizave të tij shëndetësore.

Joe Dituri, i njohur ndryshe si Dr Deep Sea, tregon rezultatet e testeve të kryera në trupin e tij dhe si ka ndryshuar ai nga marsi deri më sot.

Duke krahasuar telomeret, pjesën më të paqëndrueshme të ADN-së që dobësohet me kalimin e moshës, duket se të tijtë “janë 20% më të gjatë” dhe gjithashtu ka 10 herë më shumë qeliza staminale sesa kur u zhvendos në podin e zhytjes. Për më tepër, shënuesit inflamatorë u përgjysmuan dhe kolesteroli iu ul ndjeshëm.

Këto ndryshime për mirë në shëndet janë pikërisht për shkak të presionit që i nënshtrohet Dituri në kushtet aktuale të jetesës. Presioni është i ngjashëm me atë të dhomave hiperbarike, ku rrjedha e gjakut cerebral, metabolizmi cerebral dhe mikrostruktura e trurit janë përmirësuar, me përmirësimin e funksioneve konjitive, fizike dhe të gjumit.