Këtë javë plani për lehtësimin e masave, Prishtina e Ferizaj kërkojnë të dalin nga karantina

Masat e vendosura kundër përhapjes së koronavirusit nga kjo e hënë janë lehtësuar në Shqipëri.

Përveç mundësisë për të dalë më gjatë nga shtëpia, ky vend ka lejuar që të punojnë edhe taksistët e edhe institucionet e drejtësisë, transmeton KOHA.

Lehtësimin e masave në javët në vazhdim ka vendosur të aplikojë edhe Italia, si një ndër vendet me më të prekur me Covid-19.

E një gjë të tillë pritet që ta bëjë edhe Kosova, e cila deri më tani ka mbi 760 raste.

Nga Ministria e Shëndetësisë, duke mos dhënë shumë detaje, kanë paralajmëruar hapjen e një pjese të bizneseve dhe lejimin e punës në sektorin e ndërtimit.

Zyrtarë të MSH-së për KOHËN kanë thënë se janë duke e përgatitur një vendim lidhur me masat e reja, e që pritet shumë shpejt të publikohet.

Disa komuna tash e sa javë vazhdojnë të jenë zona të karantinuara. Ndër to është edhe ajo e Ferizajt, e cila ka më së shumti raste me Covid-19, por që kryetari i kësaj komune, Agim Aliu, ka kërkuar që të largohen nga karantina.

Ai thotë se situata në këtë komunë është e menaxhueshme.

Largim nga karantina ditë më parë ka kërkuar edhe kryetari i Komunës së Prishtinës, Shpend Ahmeti.

Megjithatë, drejtori i Shëndetësisë në këtë komunë, Bujar Gashi, paralajmëron për rreziqet eventuale të një veprimi të tillë.

E qytetarët thonë se ndonëse karantimi po u sjell probleme, kjo masë duhet të vazhdojë të qëndrojë edhe më tutje.

Largimin e kryeqytetit nga karantina e ka propozuar edhe Oda Ekonomike e Kosovës, e cila edhe ka kërkuar që të lejohet puna në sektorë që kanë rrezikshmëri të ulët të përhapjes së koronavirusit, siç janë ndërtimtaria dhe prodhimi.