“Korrektësia, suksesi ynë”, 18 deri në 26 mijë euro rruga nga Shqipëria në Angli me kamion, “Daily Mail” nxjerr pamjet

Mediat britanike vijojnë të flasin pothuajse çdo ditë për shqiptarët. Së fundmi, ka qenë prestigjiozja “Daily Mail”, e cila me anë të fotove dhe videove tregon mënyrat sesi shqiptarët po “ftojnë” nëpërmjet rrjeteve sociale bashkatdhetarët e tyre për t’i dërguar në mënyrë të jashtëligjshme, por 100 për qind të sigurt, në Angli.

Sipas prestigjiozes angleze, shqiptarët vijojnë të pa shqetësuar që të reklamojnë “biznesin” e tyre në rrjetet sociale, e kryesisht në “Tik-Tok”, duke treguar datat e nisjes dhe detaje të tjera.

Në artikullin e botuar së fundmi, janë shfaqur disa postime të shqiptarëve në rrjetet sociale, ku thuhet se kërkojnë deri në 18 mijë paund për kalimin e sigurt drejt Britanisë, jo me gomone, por me kamionë.

“Ndryshe nga gomonet që kanë një vëmendje të shtuar gjatë kohëve të fundit, kalimi me kamion është më i lehtë”, shkruan Daily Mail.

Një person i paidentifikuar, pjesë e stafit të “Daily Mail”, i ka dërguar mesazh kësaj llogarie në Tik-Tok, duke i kërkuar një udhëtim për 2 persona. Çmimi i udhëtimit është 26 mijë paund. Ndërkohë një tjetër trafikant ofron udhëtime me avion me pasaporta të falsifikuara.

Pasi i publikojnë këto postime, ato fshihen brenda disa ditësh për të humbur gjurmët.