Kroacia investon dy miliardë euro në modernizimin e ushtrisë

Zëvendëskryeministri dhe ministri kroat i Mbrojtjes, Ivan Anushiq, dje njoftoi se Komiteti Parlamentar për Mbrojtjen ka miratuar blerjen e sistemeve për mbrojtje nga dronët, obusët Cezar, tanket Leopard 2A8 dhe kamionët e terrenit TATRA, me një vlerë prej gati dy miliardë eurosh.

Tanket Leopard 2A8, obusët Cezar dhe kamionët TATRA do të financohen me kredi nga instrumenti financiar SAFE i Bashkimit Evropian, ndërsa sistemi për mbrojtje kundër dronëve do të financohet nga buxheti i Ministrisë së Mbrojtjes.

Anušić theksoi se sistemi për mbrojtje kundër dronëve do të kushtojë 125 milionë euro pa TVSh, dhe bëhet fjalë për katër sisteme – dy mobile dhe dy stacionare. Këto do të mbrojnë infrastrukturën kritike ushtarake, përkatësisht dy aeroporte, si dhe pjesën civile të tyre.

Blerja e përbashkët e 18 obusëve vetëlëvizëse Cezar 6×6 MK2 po realizohet përmes Agjencisë Franceze të Armatimit (DGA), së bashku me Estoninë, Bullgarinë, Portugalinë dhe Slloveninë. Blerja është e ndarë në dy paketa, që përbëjnë një proces të vetëm prokurimi.
Paketa bazë përfshin 18 obusë vetëlëvizës Cezar, ndërsa paketa shtesë përfshin mjete për zbulim dhe ndjekje objektivash, sisteme për kontrollin e zjarrit, komunikim dhe transmetim informacioni, automjete komunikimi, automjete të blinduara dhe automjete transporti për municion luftarak. Vlera e blerjes është rreth 320 milionë euro.

Deri në fund të vitit do të nënshkruhet marrëveshja për blerjen e 44 tankeve moderne Leopard 2A8, dhe pritet që tanket të dorëzohen në Kroaci nga viti 2028 deri në vitin 2030. Vlera e kësaj blerjeje është rreth 1,3 miliardë euro.
Kamionët TATRA plotësojnë të gjitha standardet e NATO-s për mbrojtje balistike dhe nga minat, dhe përdoren nga 21 anëtare të NATO-s. Vlera e blerjes së 420 kamionëve është rreth 200 milionë euro, me afat dorëzimi nga viti 2026 deri në vitin 2030.