Kurti për kritikat e ndërkombëtarëve: Të mirëseardhura, por duhet ta mbroj Kosovën

“Së pari nuk më pengojnë kritikat…Kritikat janë të shëndetshme. S’ka progres pa kritika. Mund të mos pajtohemi, por SHBA-ja, BE-ja dhe Britania e Madhe janë aleatët tanë, miqtë dhe partnerët tanë. Nuk do të thotë se bashëpunimi ynë është rrugë njëkahëshe. Duhet ta dëgjojmë njëri-tjetrin. Dhe në këtë kuptim, besoj se duhet ta mbroj Kosovën, duhet ta përfaqësoj më mirë edhe se aleatët tanë. Nuk do të isha kryeministër nëse Kosova s’do të ishte Republikë dhe nuk është vetëm pjesërisht e njohur, por nga 117 shtete nëpër botë, 22 nga 27 shtete anëtar të BE-së dhe 26 nga 30 shtete anëtare të NATO-s…Po ashtu Kosova e ka marrë organizimin e Lojërave Mesdhetare të vitit 2030 së bashku me Durrësin”, tha Kurti.

Për periudhën e kaluar në burg, Kurti ka përshkruar torturuat, por edhe se si ajo periudhë e ndihmoi të mësonte të lidhej me njerëz që vinin nga fshati dhe se më pas kjo e çoi te krijimi i Lëvizjes Vetëvendosje.

“Mund të flas se si është në burg, për periudhën kur u burgosa nga UNMIK-u, EULEX-i e Policia e Kosovës. Por, gjatë Serbisë ishte si kamp përqendrimi. Humba gati 30 kilogramë në vitin 1999. Kishte tortura sistematike. Rrahje, që nganjëherë ndodhin edhe disa herë në ditë. Rrahje me shkopinj, shumë gardianë njëkohësisht. Këta ishin gardianë. U torturova nga uniforma”, tha Kurti.

Ai ka treguar se si ishte dënuar me 15 vjet burgim, por i mbajti 2 vjet e 7 muaj, fillimisht në Lipjan e më pas u transferua në Pozharec.

“Më 10 qershor 1999, kur Serbia po tërhiqte policinë e forcat ushtarake, në konvoj vendosën autobusë të kuq me të burgosur politikë shqiptarë në mes të tyre, që NATO-ja të mos bombardonte. Na përdorën si mburojë. U transferova në burg në Pozharec nga Lipjani, e Pozhareci ishte vendlindja e Millosheviqit. Kalova total 2 vjet e 7 muaj në burg. Një vit e 5 muaj gjatë Millosheviqit, 1 vjet e dy muaj në periudhën e Koshtunicës”.

Ai thotë se në fillim i kishin kërkuar informata, por më pas thjeshtë e mbanin nga zemërimi që kishin me bombardimet e NATO-s.

“Thoshin se do të paguani se çfarë po na bën ne NATO-ja. Pa menduar se çfarë bën ata që NATO-ja po i bombardonte”, tha Kurti.

Kurti thotë se në burg mësoi si të lidhej e të fliste me njerëz nga fshati: Pasi dola formova organizatën

Kurti ka treguar se në burg kishte bërë plane për më gjatë.

“Planifikova të mësoja gjuhë të huaja në burg. Në Pozharec gjeta libër në gjuhën italiane. Mendova të mësoja italishten në burg, pasi ishte libri i vetëm aty. Më vonë filluan të më sillnin libra të tjerë, kryesisht autorë rusë, pasi donin të më poshtëronin. I lexova të gjithë, Dostojevskin e Pushkinin në burg, në gjuhë serbo-kroate”, tha Kurti. “Në burg ke hapësirë shumë të vogël e ke shumë kohë, është vend për të lexuar vërtetë dhe pa shpërqendrim. Në burg atje po qëndroja me njerëz që vinin nga fshatrat, ishte shumë me rëndësi për aftësinë time që të organizojë njerëzit kur të dilja. Kur dola arrita të krijoja organizatën, pasi dija si të flisja e të lidhesha me njerëzit që vinin nga fshatrat”.

Kurti për torturat në burgjet serbe: Humba vetëdijen 40 herë, s’besova se do të dilja gjallë

Kurti ka treguar se si nuk e besonte se do të dilte gjallë nga burgu.

“E humba vetëdijen afro 40 herë gjatë torturave, pra nuk kishte as gjasa të imagjinoja se do të dilja gjallë. Atje po na rrihnin të gjithë të burgosurve shqiptarë, nuk isha vetëm unë. Kishte mijëra shqiptarë. Për të mbijetuar nga torturat duhet të kesh edhe fat. Pashë njerëz që vdiqën pas 5 minutave të rrahjeve e torturave, e pashë njerëz, këtu përfshihem edhe unë, që u rrahëm shumë e dolëm gjallë. Nuk ishte në dorën tonë”, ka thënë Kurti.

Kurti ndër të tjera ka thënë se beson që presidenti rus Vladimir Putin qëndron “prapa vrasjes së liderit opozitar rus Alexey Navalny”.

Kurti: Tensionet në Kosovë po shkaktohen nga autokrati në Beograd

Kurti ka thënë se gjatë karrierës së tij politike ka bërë kompromise, por se ato janë “harruar apo kanë mbetur hije të insistimit dhe konsistencës” së tij.

Kurti ka theksuar se dy parime janë ato që është munduar t’u qëndrojë besnik kur bëhet fjalë për kompromise.

“E para të bëhen kompromise, por jo në qendër”, tha Kurti. “E dyta të sigurohemi që nëse bën kompromis, të mos reflektohet ajo në potencialin tuaj”.

Kurti ka thënë se më tepër e do “Republikën e Kosovës, kombin shqiptar e po ashtu Brukselin, Washingtonin e Londrën”.

Sa u përket tensioneve në Kosovë, ai ka thënë se ato krijohen nga presidenti i Serbisë, Aleksandar Vuçiq.

“Nëse burimi i tensioneve do të ishte në terren nga poshtë, atëherë s’do të isha aq optimist. Por, gjithë tensioni që kemi në Kosovë është për shkak të autokratit në Beograd. Ai është nervoz dhe në panik pasi që serbët në Kosovë duan të integrohen, pasi e shohin se si mund të përfitojnë nga integrimi. E nuk bëhet fjalë këtu për 40 për qind, as për 14 për qind, por për 4 për qind të popullatës. Ishin 10 për qind në të 90-t. Por shumica u larguan, pjesa më e madhe e tyre me policinë dhe ushtrinë në verën e vitit 1999. Unë jam kryeministër edhe i serbëve. Serbët kanë 10 ulëse të rezervuara në Parlament, gjuha serbe është zyrtare në të gjitha nivelet e administratës në Kosovë. Zëvendësavokati i Popullit është serb…Ky sukses po rrit tensionet të shkaktuara nga Beogradi, që është shumë i shqetësuar që po kemi sukses në integrimin e serbëve”, ka thënë Kurti.

Kurti ka thënë se me veprimet e saj në terren, Serbia po synon ta ndajë Kosovën, ta aneksojë veriun.

Kurti për bashkimin me Shqipërinë: S’e përjashtoj, por fitova zgjedhjet për punë dhe drejtësi

Kryeministri i Kosovës, Albin Kurti, gjatë bisedës është pyetur edhe për idetë e tij të dikurshme për bashkimin me Shqipërinë.

“Kosova e Shqipëria janë dy shtete të ndryshme, por jo dy kombe të ndryshme. Nganjëherë ke shumë më tepër dallime mes shqiptarëve në Shqipëri apo mes shqiptarëve në Kosovë, sesa mes Kosovës e Shqipërisë”, ka thënë Kurti, kur është pyetur për bashkimin e mundshëm me Shqipërinë. “…Nuk do ta përjashtoj këtë, por unë kam fituar postin e kryeministrit për punë e drejtësi. Të jem i sinqertë këtë e bëj më së miri”.

I pyetur nëse një bashkim i Kosovës me Shqipërinë do të mund të shfrytëzohej nga Republika Sërpska që të bashkohej me Serbinë, Kurti ka thënë se analogjia nuk do të qëndronte.

“Republika Sërpska është krijim i gjenocidit të Srebrenicës”, ka thënë Kurti.

Kurti flet për zgjedhjet e ardhshme në SHBA

Albin Kurti është pyetur edhe për zgjedhjet e nëntorit që do të mbahen në SHBA. Kurti në zgjedhjet e kaluara kishte mbështetur presidentin aktual të SHBA-së, demokratin Joe Biden.

Kurti ka lënë të kuptohet edhe kësaj radhe se është me Bidenin, por nuk ishte aq i prerë.

“Para zgjedhjeve të fundit publikisht e kam mbështetur Joe Bidenin. Mendoj se në një nivel, kushdo që fiton në SHBA, në sytë e SHBA-së Kosova do të vazhdojë të jetë Republikë e pavarur, sovrane e demokratike. Mirëpo, gjërat po ndryshojnë shpejt. Njerëzit janë të shqetësuar. Në rastin e zgjedhjeve të ardhshme, është e vështirë të parashikohet. Por, besoj se Kosova e SHBA-ja do të vazhdojnë të kenë marrëdhënie të shkëlqyera. Unë nuk kam pse të flas kë përkrahi, jam socialdemokrat. Punoj me partinë demokratike në SHBA, me NDI në Kosovë”, tha Kurti.