Suedia ka ekstraduar në Turqi personin e parë të dënuar për lidhje me Partinë e Punëtorëve të Kurdistanit (PKK), të cilën Ankaraja e konsideron një organizatë terroriste.
Mahmut Tat, i dënuari me gjashtë vjet e 10 muaj burg në Turqi, është sjellë në Stamboll dhe është dërguar në paraburgim. Tat kërkoi azil në Suedi në vitin 2015, por iu refuzua dhe së fundmi u ndalua nga policia suedeze.
Ky është hapi i parë konkret i Suedisë në zbatimin e memorandumit për anëtarësimin në NATO, të nënshkruar me Turqinë në qershor, i cili përfshin ekstradimin e personave të përfshirë në aktivitete terroriste.
Ekstradimi i Tat-as u bë dy ditë pas bisedimeve midis ministrave të jashtëm të Turqisë dhe Suedisë në prag të takimit të ministrave të jashtëm të NATO-s në Bukuresht.
Ministri turk Mevlut Cavusoglu tha pas takimit se Ankaraja respekton synimin e vendosur të Suedisë për t’u anëtarësuar në NATO, por se pret hapa konkretë në zbatimin e marrëveshjes për ekstradimin e terroristëve në Turqi.
