Manastiret e Luginës së Drinosit pjesë e “World Monuments Watch 2025”

Ambasada e SHBA ka reaguar pasi Manastiret e Luginës së Drinosit janë bërë pjesë e “World Monuments Watch 2025”.

Këto manastire, të cilat u zgjedhën mes 200 nominimeve nga e gjithë bota, janë identifikuar si një nga 25 sitet që përballen me sfida të mëdha në ruajtjen e trashëgimisë kulturore. Ky vlerësim thekson rëndësinë e jashtëzakonshme globale të trashëgimisë kulturore të Shqipërisë dhe mundësitë e tij për të kontribuar në ruajtjen dhe promovimin e vlerave historike dhe kulturore, shkruan A2 CNN.

Ambasada e SHBA në Tiranë ka nënvizuar se është krenare për mbështetjen që i ofron këtyre manastireve të lashta përmes Fondit të Ambasadorëve për Trashëgiminë Kulturore. Ky fond ka për qëllim të ndihmojë në mbrojtjen, restaurimin dhe rigjallërimin e këtyre monumenteve të rëndësishme, duke mundësuar që pasuria e trashëgimisë kulturore të Shqipërisë të mbetet e ruajtur për brezat e ardhshëm. Përveç asaj, mbështetja ka një ndikim pozitiv edhe për komunitetet lokale, duke kontribuar në zhvillimin e qëndrueshëm dhe rritjen e turizmit kulturor në rajon.