Ministri i Mbrojtjes i Putinit u shfaq në një takim me gjeneralët, por edhe kjo video ngre disa dyshime

Pas disa jave mosparaqitje në publik, ministri i Mbrojtjes së Rusisë, Sergei Shoigu ëshë shfaqur me anë të një video të publikuar nga media shtetërore ruse së bashku me liderët ushtarakë. Por zyrtarët perëndimorë dyshojnë se paraqitja e Shoigut mund të jetë e incizuar më herët.

Në adresimin e tij ministri i Mbrojtjes s’ka komentuar mungesën e tij disajavore në publik por ka thënë se ministria e tij po e përmirëson furnizimin me armë dhe mjete të tjera për ‘operacionin special’ në Ukrainë, shkruan Jutarnji.

Zyrtarët perëndimorë dhe ukrainas kanë spekuluar gjerësisht ditët e fundit për statusin e Shoigut – u përmend shkarkimi i tij i supozuar, ai u spekulua se ishte arrestuar për gjoja bashkëpunim me CIA-n dhe një këshilltar i ministrit të policisë së Ukrainës tha se kishte pësuar një atak në zemër.

Shoigu u “shfaq” për publikun nga mediat shtetërore edhe të enjten, por shkurtimisht, si pjesëmarrës në një takim virtual me Vladimir Putin. E pazakontë për të, ai ishte me një kostum civil dhe shfaqej vetëm në njërën pjesë të ekranit me probleme të dukshme teknike, gjë që solli spekulime të reja se bëhej fjalë për një regjistrim të vjetër.
Zëdhënësi i Kremlinit Dmitry Peskov tha se Shoigu nuk ishte në publik për arsye “të kuptueshme” sepse, siç tha ai, ai ka shumë detyrime gjatë “operacionit special ushtarak” dhe se tani nuk është koha për aktivitete mediatike.