Prej disa ditëve, reagime mes Qeverisë dhe partisë së Ramush Haradinajt ka ngritur çështja e shpronësimeve për ndërtimin e rrugës nacionale Prishtinë-Pejë, përkatësisht segmenti Kijevë-Klinë-Zahaq. Ministri i Financave, Hekuran Murati, në një konferencë pati thënë se ka mospërputhje të shifrave prej 12 milionë eurosh në këto shpronësime dhe se ishte keqpërdorur buxheti i shtetit, në totalin prej 43 milionë eurove sa ishin vlerësuar për procesin e shpronësimit.
Mirëpo, këtë nuk e pranoi AAK-ja e cila atë kohë kur nisën shpronësimet, ishte në pushtet.
Murati edhe sot ka reaguar lidhur me këtë temë. Në Facebook ka shkruar për mospërputhjen në çmimet e tokave.
“Toka që AKM/AKP e kishte privatizuar për 6 euro/arin, në tabelat e vlerësimit të dorëzuara me 17 maj në MMPH, ishte vlerësuar me 3,700 euro/ari, pra rreth 600-fishi i çmimit të blerjes. Por sikur të mos mjaftonte kjo, Qeveria Haradinaj kishte marrë vendim me 17 dhjetor 2019, që të njejtën tokë t’a shpronësojë për 7,500 euro/ari, pra 1,200-fishi (me fjalë: njëmijë e dyqind fishi i çmimit të privatizimit)”, ka thënë Murati.
Sipas tij, me një llogaritje të tillë nga 43 milionëshi i tërësishëm i vlerës së përcaktuar nga Qeveria Haradinaj atë kohë, “një person i vetëm do të merrte 4.9 milionë euro, nëse keqpërdorimi do të shkonte deri në fund”.
Ndërkaq shton se fakte ka mjaftueshëm, vetëm se Prokuroria dhe organet e rendit duhet të veprojnë.
AAK-ja ditë më parë tha se denoncimet që ua bënë janë zhurmë e propagandë publike.
