Naftëtarët e Ballshit në ditën e dytë të grevës së urisë: Nuk dalim pa marrë pagat

Naftëtarët e Ballshit kanë hyrë në grevë urie që prej mesditës së djeshme. Gazetarja e Abc News, Valbona Davidhi raporton live nga vendi ku janë ngujuar naftëtarët. Ajo shprehet se janë 10 naftëtarë në grevë urie, ndërsa shumë të tjerë vazhdojnë protestën jashtë dyerve të rafinerisë së naftës në Ballsh. Naftëtarët e Ballshit kanë protestuar prej ditësh për pagat e prapambetura, dhe pasi nuk gjetën zgjidhje vendosën të futen në grevë urie pa afat.

Para se të niste greva e urisë, naftëtarët takuan përfaqësues të kompanisë, por nuk kanë rënë dakord për pagat e prapambetura. Pra kompania nuk ka pranuar të paguajë pagat e prapamebtura të këtyre naftëtarëve.

Janë rreth 1000 mijë familje në Ballsh që sigurojnë të ardhurat nga puna në uzinën e naftës, të cilët janë në vështirësi ekonomike për shkak të dështimeve të njëpasnjëshme në menaxhimin e rafinerisë.

Bankers nuk furnizon uzinën me naftë bruto

Gazetarja Valbona Davidhi që ka ndjekur nga afër këtë problematikë, tha se puna në rafineri ka ndalur në muajin tetor.

Naftëtarët janë 3 muaj të papaguar, por ndërkohë siguracionet për ta nuk janë derdhur nga kompania prej 18 muajsh.

“Është konfuzion për pagesat e sigurimeve se ndërkohë që ata mendonin se ishin duke u siguruar, rezultoi se nuk ishin derdhur sigurimet. Ndalesa e punës në uzinë ishte e paralajmëruar nga vetë administratotët e fundit që kishin dhënë sinjale se kishin mungesë të furnizimit me naftë bruto që është ekskluzivitet i Bankers. Ata u ankuan tek Autoriteti i Konkurencës, uzina u rivendos në punë, por më pas duket se problemi ishte për çmimin e naftës duke çuar sërish në mosfurnizimin e uzinës nga Bankers”, tha gazetarja e abcnews.al.