Ndahet nga jeta At Nikolla Marku, prifti i Kishës Ortodokse Autoqefale Shqiptare “Shën Maria” në Elbasan

Mbrëmjen e së shtunës, më 19 korrik, në orën 22:00, është ndarë nga jeta pas një sëmundjeje të gjatë dhe të rëndë At Nikolla Marku, në moshën 77-vjeçare. Ai ishte prifti i Kishës Ortodokse Autoqefale Shqiptare “Shën Maria” në Elbasan dhe një prej figurave më të njohura për përkushtimin e tij në shërbim të besimit dhe komunitetit.

Për dekada me radhë, At Nikolla Marku e ktheu kishën në lagjen Kala të Elbasanit në një qendër shpirtërore të hapur dhe të gjallë për çdo besimtar, duke ruajtur me fanatizëm vlerat e trashëgimisë ortodokse shqiptare.

I njohur për qëndrimin e tij të palëkundur në mbrojtje të autoqefalisë së Kishës Ortodokse Shqiptare, At Nikolla Marku u përplas shpesh me drejtuesin e Kishës Ortodokse, Anastas Janullatos, të cilin e akuzonte për uzurpim të kryesimit të kishës dhe për ndikim të tepruar grek në çështjet fetare të vendit. Qëndrimet e tij shpesh qenë të vetmuara, por gjithmonë të vendosura dhe të artikuluara me bindje.