Netanyahu reagon ashpër ndaj videos së Hamasit me pengje izraelitë: Prodhim cinik dhe i përçmuar

Kryeministri izraelit Benjamin Netanyahu ka shprehur trishtim të thellë pas publikimit të një videoje nga organizata terroriste Hamas, ku shfaqen dy pengje izraelitë në gjendje të rëndë fizike. Në reagimin e tij, Netanyahu u tha familjeve se përpjekjet për lirimin e pengjeve vazhdojnë pa ndërprerje.

Zyra e kryeministrit deklaroi: “Kryeministri shprehu trishtim të thellë për pamjet video të publikuara nga organizata terroriste Hamas dhe u tha familjeve se përpjekjet për të kthyer të gjithë pengjet tona vazhdojnë dhe do të vazhdojnë pa pushim.”

Pamjet, të publikuara nga dy organizata islamike, synojnë të krijojnë një paralelizëm me krizën humanitare në Gaza, ku Kombet e Bashkuara paralajmërojnë për rrezikun e “urisë së përgjithshme”. Një nga skenat më të rënda të videos tregon një peng që gërmon tokën me lopatë në një tunel, duke simuluar hapjen e varrit të tij – një imazh që ka shkaktuar indinjatë të madhe në Izrael dhe në mbarë botën.

Netanyahu zhvilloi një bisedë të gjatë me familjet e pengjeve Rom Braslavsky dhe Eviatar David, duke dënuar mizorinë e Hamasit: “Ky është një prodhim cinik dhe i përçmuar, që tregon mizorinë e Hamasit që nuk njeh kufij.”

Në Tel Aviv, dhjetëra mijëra njerëz u mblodhën për të shprehur solidaritet me familjet dhe kërkuan lirimin e menjëhershëm të pengjeve, duke bërë thirrje për veprime më të ashpra nga qeveria dhe presion ndërkombëtar ndaj Hamasit.

Kryeministri paralajmëroi se militantët e Hamasit po përdorin civilët e Gazës si mjete propagande, duke bllokuar ndihmat dhe duke ndërtuar një narrativë të rreme kundër Izraelit.

“Bëj thirrje që vendet e botës të mobilizohen për të dënuar pa mëdyshje abuzimet kriminale naziste të organizatës terroriste Hamas,” përfundoi Netanyahu.