Ngërçi për t’i dhënë fund luftës në Ukrainë, Trump bisedë telefonike me Putinin

Presidenti i SHBA-së, Donald Trump, zhvilloi sot një bisedë telefonike me homologun e tij rus, Vladimir Putin, në lidhje me paqen në Ukrainë.

Sipas mediave të huaja, telefonata erdhi pasi Uashingtoni tha se kishte një bllokim për përfundimin e konfliktit më vdekjeprurës të Evropës që nga Lufta e Dytë Botërore dhe se Shtetet e Bashkuara mund të duhet të tërhiqen, nëse ngërçi nuk zgjidhet.

Presidenti Putin dërgoi dhjetëra mijëra trupa në Ukrainë në shkurt të vitit 2022, duke shkaktuar konfrontimin më të rëndë midis Rusisë dhe Perëndimit që nga Kriza e Raketave Kubane të vitit 1962.

Trump, i cili thotë se dëshiron të mbahet mend si një paqebërës, ka bërë vazhdimisht thirrje për t’i dhënë fund “gjakderdhjes” së Ukrainës, të cilën administrata e tij e përshkruan si një luftë me ndërmjetës midis Shteteve të Bashkuara dhe Rusisë.

Nën presionin e Trump, delegatët nga vendet ndërluftuese u takuan javën e kaluar në Stamboll për herë të parë që nga viti 2022, pasi Putini propozoi bisedime të drejtpërdrejta, dhe evropianët e Ukraina kërkuan një armëpushim të menjëhershëm.

Një zyrtar i Shtëpisë së Bardhë tha se telefonata ishte duke u zhvilluar. Putin po fliste nga vendpushimi rus në Detin e Zi, Soçi, ndërsa Trump ishte në Uashington.

Pak para telefonatës, zëvendëspresidenti i SHBA-së, JD Vance, u tha gazetarëve se Uashingtoni e pranoi se kishte një ngërç në përfundimin e luftës dhe se nëse Moska nuk ishte e gatshme të angazhohej, atëherë përfundimisht Shtetet e Bashkuara do të duhej të thoshin se ‘nuk ishte lufta e tyre’.

“E kuptojmë se ka një ngërç të vogël këtu. Dhe mendoj se presidenti do t’i thotë Presidentit Putin: ‘Dëgjo, a je serioz? A je i sinqertë me këtë?'” tha Vance ndërsa përgatitej të largohej nga Italia.

“Sinqerisht mendoj se Presidenti Putin, ai nuk e di tamam si të dalë nga lufta”, tha Vance, duke shtuar se sapo kishte folur me Trumpin, shkruan A2 CNN.

Ai tha se “duhen dy veta për të kërcyer tango. E di që Presidenti është i gatshëm ta bëjë këtë, por nëse Rusia nuk është e gatshme ta bëjë këtë, atëherë ne përfundimisht do të themi se kjo nuk është lufta jonë”.

“Do të përpiqemi ta përfundojmë, por nëse nuk mund ta përfundojmë, përfundimisht do të themi: ‘E dini çfarë? Ia vlente të provonim, por nuk do ta bëjmë më'”, përfundoi ai.