“Nuk talleni dot me mua”, Trump kërcënon me tërheqje nga ndërmjetësimi për luftën në Ukrainë

Presidenti amerikan Donald Trump ka dhënë sinjale të forta për mundësinë e tërheqjes së Shteteve të Bashkuara nga përpjekjet për ndërmjetësimin e paqes mes Rusisë dhe Ukrainës. Gjatë një deklarate për shtyp në ceremoninë e betimit të Mehmet Oz si drejtor i Qendrave për Shërbimet e Medicare dhe Medicaid, Trump theksoi se “nëse nuk ka entuziazëm nga të dyja palët, atëherë ne thjesht do të largohemi nga procesi.”

Ai sqaroi se është i gatshëm të punojë për një marrëveshje paqeje, por paralajmëroi se nuk do të tolerojë lojëra diplomatike.

“E gjithë jeta ime ka qenë një negociatë e madhe. Mund të dalloj kur dikush po tallet me mua”, tha Trump. “Askush nuk tallet dot me mua”, shtoi ai.

Presidenti amerikan theksoi se ekziston një mundësi reale për zgjidhjen e konfliktit, por bëri të qartë se Shtetet e Bashkuara nuk do të qëndrojnë në tryezën e bisedimeve nëse nuk ka përkushtim real nga të dyja palët. “Ne do ta arrijmë këtë, në mënyrë ideale. Por nëse ndonjëra nga palët e bën shumë të vështirë, atëherë do ta kapërcejmë dhe do të largohemi”, u shpreh ai.

Deklaratat e Trump vijnë menjëherë pas një qëndrimi të ngjashëm nga Sekretari Amerikan i Shtetit, Marco Rubio. Gjatë një udhëtimi në Evropë, Rubio deklaroi se SHBA po shqyrton mundësinë e tërheqjes nga procesi i paqes nëse nuk ka përparim të dukshëm.

“Nuk është lufta jonë, nuk e kemi nisur ne”, u shpreh ai nga Parisi, pas takimeve me zyrtarë evropianë dhe ukrainas.

Rubio konfirmoi se Trump ka kaluar 87 ditë duke punuar për t’i dhënë fund konfliktit, por tani është koha për të vlerësuar nëse një zgjidhje është realisht e mundur. Ai shtoi se presidenti amerikan mbetet i interesuar për paqen, por do t’i japë prioritet çështjeve të tjera globale nëse situata në Ukrainë ngec.

Sipas Rubios, Mbretëria e Bashkuar, Franca dhe Gjermania mund të luajnë një rol kyç në afrimin drejt një zgjidhjeje.

“Idetë e tyre janë shumë të dobishme dhe konstruktive”, u shpreh ai, duke lënë të hapur një mundësi për angazhim më të madh evropian në negociata.

Në sfondin e këtyre zhvillimeve, qëndrimi i SHBA-së po hyn në një fazë kritike, ku durimi diplomatik duket se po i afrohet fundit.