Olaf Scholz: Joe Biden është më i mirë se Donald Trump, duhet të rizgjidhet president

Sipas mediave të huaja, duke iu drejtuar nxënësve në një shkollë fillore afër Berlinit, Scholz akuzoi Trumpin se ishte përçarës dhe se ai do të ishte i keq jo vetëm për Shtetet e Bashkuara, por edhe për Gjermaninë.

Siç vënë në pah mediat, gjuha jashtëzakonisht e drejtpërdrejtë e përdorur nga Scholz mund të pasqyrojë sesi marrëdhëniet dypalëshe ishin shpesh të tendosura gjatë presidencës Trump, të udhëhequr në atë kohë nga paraardhësja e Scholz, Angela Merkel, kur Scholz ishte ministër i financave.

Duke iu përgjigjur pyetjes së një nxënësi, Scholz citohet të ketë thënë: “Unë mendoj se presidenti aktual është më i mirë, kështu që unë dua që ai të rizgjidhet”.

Shërbimi publik shumëvjeçar i Bidenit do të thotë se ai e di saktësisht “çfarë duhet të bëni për të parandaluar që bota të shkojë në luftë”, ka thënë më tej Scholz.

Ndërsa duke iu referuar Trumpit, Scholz tha: “Nëse të gjithë njerëzit janë vetëm kundër njëri-tjetrit, atëherë nuk mund të ketë një të ardhme të mirë dhe kjo është arsyeja pse ish-presidenti ‘qëndron prapa’ një ndarjeje të madhe në vend”.

Sondazhet e fundit tregojnë se Biden ka një avantazh ndaj sfiduesve të mundshëm republikanë Donald Trump dhe Ron DeSantis ndërsa zgjedhjet presidenciale të nëntorit 2024 në SHBA po afrohen.

Scholz ka thënë gjithashtu se Rusia nuk mund ta fitojë luftën në Ukrainë.