Presidentja e vendit Vjosa Osmani ka mirëpritur miratimin e rezolutës kundër mbajtjes së referendumit të Serbisë në territorin e Kosovës.
Në një postim në Facebook, Osmani po ashtu ka theksuar se mirëpret edhe konsensusin e arritur mes grupeve parlamentare, shkruan Gazeta Online Reporteri.net.
“Mirëpres konsensusin mes grupeve parlamentare në Kuvendin e Republikës së Kosovës dhe miratimin e rezolutës kundër mbajtjes së referendumit të Serbisë në territorin e Republikës së Kosovës. Institucionet e Republikës së Kosovës njëzëri refuzojnë mbajtjen e referendumit të Serbisë në kundërshtim me normat kushtetuese dhe praktikën ndërkombëtare”, ka shkruar Osmani në Facebook.
Osmani ka shtuar se do të vazhdojnë bashkëpunimin me aleatët në fuqizimin e sovranitetit dhe ruajtjen e integritetit territorial të Kosovës ndaj veprimeve destabilizuese dhe të njëanshme të Serbisë.
Kuvendi i Kosovës ka miratuar rezolutën kundër organizimit të referendumit serb në Kosovë.
Për miratimin e kësaj rezolute kanë qenë 76 vota për, asnjë kundër dhe një abstenim.
Kjo rezolutë përmban gjithsej 8 pika.
