Parlamenti Evropian voton sot raportin për Serbinë, kërkohet njohja e pavarësisë së Kosovës

Deputetët e Parlamentit Evropian do të votojnë sot në  Strasburg për raportin e këtij viti për Serbinë.

Siç shkruan mediumi shtetëror serb RTS, ky raport përveç se do të shprehë i mbështetjen për anëtarësimin e ardhshëm të Serbisë në BE, kërkesë të veçantë do të ketë harmonizimin e Serbisë me sanksionet kundër Rusisë, gjë që do të  jetë një element kyç që do të përcaktojë përparimin e përgjithshëm të Serbisë në rrugën drejt anëtarësimit.

Po ashtu në raport përmendet edhe normalizimi i marrëdhënieve me Kosovën. Raporti thekson se “Serbia dhe Kosova pritet të nënshkruajnë një marrëveshje ligjërisht të detyrueshme për normalizimin e marrëdhënieve në bazë të njohjes reciproke”, transmeton Gazeta Online Reporteri.net.

Kjo është hera e parë që njohja reciproke përmendet në një dokument zyrtar të një Institucioni i BE-së si zgjidhje e domosdoshme për dialogun Beograd-Prishtinë.

Raporti i Parlamentit Evropian merr formën e një rezolute, e cila nuk është fillimisht detyruese, por paraqet udhëzime politike për vendin në procesin e integrimit evropian.