Për inat të Turqisë, Parlamenti i Sirisë njeh genocidin armen

Parlamenti i Sirisë njohu vrasjen e 1.5 milion armenë si genocid të enjten. Vendimi vjen mes përshkallëzimit të dhunës midis Turqisë dhe Sirisë brenda dhe rreth Idlibit.

“Parlamenti … dënon dhe njeh genocidin e kryer kundër armenëve nga shteti osman në fillim të shekullit XX,” thuhet në një deklaratë të Parlamentit të Sirisë.

Presidenti i Turqisë, Recep Tayyip Erdoğan, ka deklaruar se nëse ushtarët turq në Siri përsëri shënjestrohen, Turqia do të sulmojë forcat e regjimit të Bashar al-Asadit pavarësisht marrëveshjes së vitit 2018 në Soçi me Rusinë.

“Nëse u bëhet ndonjë dëm ushtarëve tanë në postet e vëzhgimit (në Idlib) ose kudoqoftë (në Siri), unë deklaroj se prej atje do të godasim forcat e regjimit kudo, pavarësisht nga marrëveshja e Soçit”, tha presidenti Erdoğan në një fjalim para grupit parlamentar të partisë së tij në Ankara.

Erdoğan tha se vendi i tij është i vendosur që deri në fund të shkurtit të largojë forcat e regjimit sirian nga postet e vëzhgimit të Turqisë në Idlib. Ai shtoi se për të larguar forcat e regjimit, Turqia “do ta bëjë pa hezimit atë që është e nevojshme përmes tokës dhe ajrit”.