Policia detyrohet të shtijë me armë zjarri, vetura në veri refuzon të ndalet

Policia e Kosovës ka shtënë me armë zjarri në drejtim të një veture në veri të Kosovës, pasi vozitësi i saj kishte refuzuar që të ndalonte për kontroll, njoftoi të enjten Policia e Kosovës përmes një komunikate për media.

Në njoftim thuhet se ngjarja ka ndodhur rreth orës 19:00 në mbrëmje në fshatin Banje dhe sipas njoftimit, drejtuesi i automjetit porsa i ka vërejtur zyrtarët policorë të cilët e kanë sinjalizuar për ndalim, e ka rritur shpejtësinë duke rrezikuar jetën e zyrtarëve policorë.

“Më datë 9 mars 2023, rreth orës 19:20, përderisa njësia policore e Policisë së Kosovës ndodhej në pikë kontrolli në fshatin Banje në një rrugë ilegale, duke realizuar detyrat dhe autorizimet e saj ligjore në garantimin e sigurisë, aty ka ardhur/qarkulluar një automjet xhip i tipit Audi”.

“Zyrtarët policor në pikë kontrolli sipas procedurave kanë sinjalizuar automjetin me bateri që të ndaloj për kontroll rutinor, por personi i dyshuar (drejtuesi i automjetit) porsa ka vërejtur zyrtarët policor të cilët e kanë sinjalizuar për ndalim, ka rritur shpejtësinë për të ikur nga ndalimi duke rrezikuar drejtpërdrejt jetën e zyrtarëve policor”.

Automjeti i dyshuar me shpejtësi është larguar nga vendi i ngjarjes përmes rrugëve ilegale, përderisa njësitet policore janë duke ndërmarr veprime operative dhe hetimore për identifikimin dhe arrestimin e personit/ve të dyshuar të përfshirë në këtë rast.

Gjithashtu, thuhet se si vazhdimësi e hetimit gjatë realizimit të detyrave policore, njësitë relevante policore kanë ndaluar dy automjete tjera të cilat kishin ardhur në atë lokacion, e që dyshohet se mund të ndërlidhen me veturën e dyshuar.