Prej 30 vitesh në arrati, arrestohet bosi më i kërkuar i mafias në Itali, Matteo Messina Denaro

Karabinierët në Itali kanë arrestuar sot Matteo Messina Denaro-n, bosin më të kërkuar të mafias në vend, i cili kishte qenë në arrati prej tre dekadash.

Denaro, i cili u arrestua në kryeqytetin sicilian Palermo, dyshohet se është kreu i mafies siçiliane ‘Cosa Nostra’.

Ai është dënuar në mungesë me burgim të përjetshëm për rolin e tij në vrasjen e prokurorëve antimafia në vitin 1992, Giovanni Falcone dhe Paolo Borsellino. Ai gjithashtu përballet me një dënim të përjetshëm për rolin e tij në sulmet me bomba në Firence, Romë dhe Milano, të cilat vranë 10 persona vitin pasues.

Denaro, i mbiquajtur ‘Diabolik’, dikur konsiderohej kandidat për të qenë bosi i bosëve të mafias siciliane, pas vdekjes së Bernardo Provenzano-s në vitin 2016 dhe Salvatore ‘Toto’ Riina-s në vitin 2017.

60-vjeçari, i cili dikur pohoi në mënyrë famëkeqe: “Mbusha një varrezë, i vetëm”, me sa duket vazhdoi stilin e jetës së tij luksoze për ca kohë pasi doli në arrati.

Në gusht 2021, transmetuesi televiziv publik italian RAI publikoi një regjistrim që daton në mars 1993 në të cilin zëri i Denaro-s u identifikua për herë të parë gjatë një gjyqi në të cilin ai u thirr për të dëshmuar. Pas disa javësh, ai u zhduk dhe që atëherë nuk ishte gjetur më.

Ai u dënua dhe u dënua në mungesë në vitin 2002 me burgim të përjetshëm për vrasjen ose urdhërimin personal të vrasjes së dhjetëra njerëzve.